Wararka ka imaanaya gobolka Qorraxay oo ka mid ah dhulka Soomaali galbeed ee ku hoos jira gumeysiga xabashida Itoobiya, ayaa sheegaya in tiro dad shacab ah oo aan waxba galabsan lagu xasuuqay deegaanno ka tirsan gobolkan, ka dib markii ay dadka deegaanku ka biya diideen dalab ka yimid maamulka ashahaaada la dirirka ah ee fadhigiisu yahay Jigjiga.
Inta la ogyahay ugu yaraan labo qof oo shacab ah ayaa ku dhintay toogasho bareer ah oo ay gaysteen maleeshiyaadka Liyuu booliska Riddada, arrintan ayaana sida la soo wariyay salka ku haysay xiisad soo kala dhexgashay dadka shacabka ah iyo maamulka Riddada.
Xiisadda ayaa timid ka dib markii maleeshiyaadka Liyuu booliska Riddada ay dadka deegaanka ku wargaliyeen inay si khasab ah uga dhisan doonaan ceel biyood deegaan lagu magacaabo Xodey gaajo, balse arrintaasi waxaa ka biya diiday dadka deegaanka, taas oo keentay in xasuuq ay ku kacaan maleeshiyaadka xabashi kalkaalka ah.
Deegaanka ay xiisaddu ka billaabatay oo lagu magacaabo Xodey Gaajo oo degmo ahaan hoos taga degmada Shilaabo waxaa lasoo wariyay in maleeshiyaadka Liyuu boolisku ku dileen ugu yaraan hal qof oo shacab ah, taas oo keentay in xiisadu kusii fido degmada Shillaabo ee gobolka Qorraxay, iyadoo halkaas na ay maleeshiyaadka murtad Cagjar ku dileen qof kale.
Mid ka mida dadka deegaanka oo lagu magacaabo Cabdirisaaq Xaaji Ibraahim ayaa warbaahinta u sheegay in halka ay ceel biyoodka doonayeen inay si khasab ah kaga qodaan maleeshiyaadka Liyuu booliska uu yahay meel ay biyo fadhiyaan xoolena ay ka qaadaan, qorshahan ayuuna sheegay in laga soo min guuriyay meel kale.
Marka laga soo tago khasaaraha dhimasho waxaa jira khasaare dhaawacyo ah oo soo gaaray dadka deegaanka ee ku dhaqan laga soo billaabo tuulada Xodey Gaajo illaa degmada Shillaabo ee gobolka Qorxay, tani ayaanan ahayn mid ugub ka ah deegaannada ay arrimiyaan maleeshiyaadka Liyuu booliska ee ku xiran dowladda xabashida ah ee Itoobiya.
About The Author
