Maxkamadda dhanka ammaanka u qaabilsan dowladda Comoros oo ah waddan yar oo dhaca bariga qaaradda Africa ayaa soo saartay xukun ka dhan ah madaxweynihii hore ee waddankaas, Kaas oo sannadadii dambe waajahayay dacwado culus oo la xiriira ku kicista falalka wax isdaba marin iyo musuqmaasuq dowladeed.
Madaxa maxkamaddaan ninka lagu magacaabo Cumar Bin Cali ayaa qoraal uu soo saaray ku sheegay in maxkamadu ay xabsi daa’in ku xukuntay madaxweyinhii hore ee dalkaas ninka lagu magacaabo Axmed Cabdullaahi Saambi oo lagu eedeyay inuu ku kacay falal uu ku sheegay khiyaano qaran.
Maxkamadda ayaa go’aamisay in lala wareego dhammaan hantida Axmed Cabdullaahi Saambi ee ku jirta qasnadda dowladda, waxay sidoo kale maxkamadda dowladda Comoros ninkan ka xayuubisay xuquuqda madaniga ah sida mushaharaadka iyo wax walba oo uu ku lahaa qasnadda dowladda.
Xeer ilaaliyaha guud ee maxkamadda dalkaas Muxamed Junaydi ayaa sheegay in uu ninkan baalmaray shaqooyinkii loo igmaday, eedaymaha loo haysto madaxweynihii hore ee Comoros ayuuna ku sheegay ay ka mid yihiin ku tagrifal awoodeed. Isagoo xusay in uu sidoo kale si bilaash ah ku bixin jiray baasaboorka si gaar ahna u siin jiray dadka ka yimaadda dhanka waddamada Khaliijka, Taas oo keentay in dowladiisu khasaarto lacago dhan 1.8 bilyan oo Yuuro.
Xukukunka maxkamaddan ayaa ka dhigan in uu madaxweynahan uu xabsiga kusii jiri doono inta cimrigiisa ka dhiman sida lagu sheegay go’aanka maxkamadda ammaanka dalkan. Ninkan ayaa xilka hoggaaminta Comoros hayay intii u dhaxaysay 2006-dii illaa 20110kii kolkaas oo la sheegay in 2008 uu soo saaray sharci dadka aan u dhalan u oggolaanaya inay si bilaaash ah ku helaan baasaboorka waddankaas.
About The Author
