Maleeshiyaadka jabhadda fallaagada ah ee Fano ayaa lasoo wariyay inay si buuxda ula wareegeen gacan ku haynta magaalo Istaraatiiji ah oo hoostagta Gonder oo ka tirsan ismaamulka Axmaarada ee waqooyiga Itoobiya.
Maleeshiyo aad u fara badan oo ka tirsan jabhadda mucaaradka ah ee Fano ayaa maanta gudaha u galay degmada Debark oo ka tirsan deegaanada ismaamulka Axmaarada, halkaas oo ay maamulayeen ciidamada federaaliga ee Abiy Axmed.
Muuqaallo koob kooban oo lagu faafiyay barta X gaar ahaan baraha taabacsan Fano ayaa lagu arkayay ciidamo ka tirsan jabhadda oo sii galaya gudaha degmada, kadib markii ay halkaasi ka eryadeen ciidamada dowladda federaaliga ah.
Ilo wareedyo Fano ku dhow ayaa sheegay in jab xooggan la gaarsiiyay ciidamada ka amar qaata taliska ciidanka millatariga ee dowladda xabashida Itoobiya, kuwaas oo dagaallo lagula galay magaalada iyo nawaaxigeeda.
Taageereyaasha Fano waxay sheegeen in magaalada ay la wareegeen ay tahay mid Istaraatiiji ah kuna taal illlinka laga galo buuraha Simieni sidoo kalena ah xarunta maamulka aaga Waqooyi ee Gonder, waxay sheegeen in arintan cadaadis saarayso ciidamada millatariga Abiy Axmed ee ku sugan magaalada Gonder, gaar ahaan kuwa ka imaanaya dhanka waqooyiga waa sida ay hadalka u dhigeene.
Jabhadda hubeysan ee Fano iyo ciidamada millatariga dowladda ayaa maalmihii u dambeeyay ku dagaallamay dhowr magaalo oo dhaca ismaamulka Amhara, horay waxaa ciidanka Abiy Axmed looga eryay magaalooyin dhowr ah oo dhaca xuduudka ay wadaagaan dalalka Itoobiya iyo Suudaan.
About The Author
