Wararka naga soo gaaraya magaalada Baladxaawo ee gobolka Gedo ayaa tibaaxaya in gilinkii dambe ee maanta ay magaaladaasi dagaal kula wareegeen maleeshiyaadka Riddada ee uu watay murtad Cabdirashiid Janan.
La wareegitaanka maleeshiyaadka kooxda Riddada ayaa yimid kaddib markii dagaal magaaladaasi looga saaray maleeshiyaadkii Riddada Jubaland ee maalmahaan ka dagaalamayey magaalada Baladxaawo.
Dad goobjoogayaan ah ayaa sheegay in maleeshiyaadka Riddada Jubbaland ay u carareen dhinaca magaalada Mandheera, iyagoo ka gudbay xadka.
Muuqaallo lagu baahiyey baraha bulshada ayaa muujinayey maleeshiyaadka uu wato murtad Cabdirashiid Janan oo la wareegay xarumo ay ka mid tahay saldhigga Booliiska, xarunta degmada iyo goobo kale.
Dagaallo socday muddo 10 cisho ah ayaa geystay khasaaro isugu jiray dhimasho iyo dhaawac soo gaaray dhinacyadii dagaalamayay iyo dad shacab ah.
Inta ay socdeen dagaalladaan waxaa jiray dad fara badan oo shacab ah oo ku dhintay kuna dhaawacmay dagaallada kuwaasi oo madaafiic ay ugu tageen guryahooda.
Sidoo kale, intii ay socdeen dagaallada waxaa magaalada ka maqnaa Isgaarsiinta oo ay jareen maleeshiyaadka Riddada Jubbaland, iyadoona inta badan shacabkii magaaladaasi ku dhaqnaa ay barakaceen.
About The Author
