Xilli ay dowladda Xabashida Itoobiya ay isku diyaarinayso in ay si rasmi ah xarigga uga jarto biya xireenka murunka badan dhaliyay ee ay ka dhistay webiga Niil ayay diidmo adag katimid dhanka dowladaha Masar iyo Suudaan.
Xukuumadda Riddada Masar ayaa markii ugu horraysay sheegtay in ay qaadacday ka qeyb galka xafladda lagu furayo biya xireenka ugu weyn qaaradda Afrika iyadoona dowladda Itoobiya ku eedaysay in ay ku xadgudubtay dhammaan heshiisyadii ay horay ugashay ee ku saabsanaa adeegsiga biyaha webiga Niil.
Warsaxaafadeed wadajir ah oo ay soo saareen wasiirrada waraabka ee dowladaha Masar iyo Suudaan ayay ku sheegeen in tallaabada ay Itoobiya kusoo gaba gabaysay biya xireenka Al Nahda ayna ku buuxisay waaskooyinka biya xireenka uu halis gelinayo qoondada ay dalalkan ku leeyihiin webiga Niilka Buluugga ah.
Haani Suweylim oo ah wasiirka biyaha Masar ayaa sheegay in dalkiisu uusan ka qeyb geli doonin casuumadda uu Abiy Axmed udiray dalalka Afrika islamarkaana ay Suudaan kala shaqeyn doonaan sugidda amniga biyaha ee webiga Niilka Buluugga ah.
Cismat Qureyshi Cabdalla oo ah wasiirka waraabka Suudaan ayaa isna sheegay in Kharduum iyo Al Qaahira ay mowqif midaysan ka qaateen arrimaha biyaha webiga Niil oo uu ku sifeeyay khad cas “Labada dowladood waxay isku raaceen in ay wada ilaashadaan xuquuqda ay ku leeyihiin biyaha webiga Niil ayna kasoo horjeedaan xadgudubka ay itoobiya sameynayso” ayaa lagu yiri warka kasoo baxay Masar iyo Suudaan.
R/wasaaraha dowladda Xabashida itoobiya ayaa isbuucii lasoo dhaafay sheegay in biya xireenka webiga ee ladhammaystiray in uu sanad soo saari doono koronto qiimaheedu yahay 1 Bilyan oo Dollar uuna fakhriga ka saari doono malaayiin qof Itoobiyaan ah isagoo iska indhatiray xiisadaha xooggan ee ka dhashay dhismaha biya xireenkan.
About The Author
