Xogo faahfaahsan ayaa kasoo baxaya weerar maalin ka hor ka dhacay meel duleedka kaga beegan magaalo madaxda dalkaasi ee Addis-ababa, halkaas oo lagu dilay sidoo kaena lagu dhaawacay masuuliyiin daacad u ah maamulka Abiy Axmed.
Warbaahinta Itoobiya waxay sheegtay in jabhadda Xoraynta dadka Oromada ee loo yaqaan OLA ay dileen Legesse Seyoum oo ahaa taliyihii saldhigga degmada Sululta iyo askar la socotay, kaddib markii ay ku beegsadeen weerar qorsheysan.
Wafdiga oo ka koobnaa booliska ismaamulka Oromia iyo ciidamada difaaca Itoobiya iyo masuuliyiinta xisbiga talada haya ayaa lagu weeraray duleedka Addis-ababa, sida ay soo sheegtay warbaahinta maxalliga ah.
Sululta oo ka tirsan ismaamulka Oromia, masuuliyiinta la dilayna fadhigoodu yahay waxay 54 KM dhanka waqooyi ka xigtaa caasimadda Itoobiya ee Addis Ababa, sidoo kale weerarka jabhadda xoraynta dadka Oromada waxaa lagu dhaawacay madaxa xisbiga talada dalka Itoobiya haya ee Barwaaqo-sooranka loogu yeero, kaasi oo ugu mgacaaban Sululta, ninka lagu magacaabo Sisay Beshada, dhaawaca soo gaaray masuulkan ayaa loo qaaday cisbitaalka, lama shaacin in uu halis yahay iyo in kale.
Jabhadda mucaaradka hubeysan ee magaceeda loo soo gaabiya OLA oo iska caabin adag kula jirta dowladda xabashida, ayaa xaqiijisay dilka saraakiishan dowladeed ee Sululta, waxayna dusha u ridatay mas’uuliyadda weerarkaasi.
Weerarkan qorsheysan ee ka dhacay duleedka Addis-ababa ayaa yimid kadib wax ka yar hal toddobaad markii Ismaamulka Oromia ee dowlada xabashida Itoobiya uu ku dhawaaqay in uu heshiis la galay ciidamo ka tirsan jabhadda Oromada (OLA), gaar ahaan ciidamo uu hoggaamiyo Jal Segni, balse garab kale oo xooggan oo ka tirsan jabhadda OLA ayaa beeniyay heshiiska, waxayna durba fuliyeen weerar sarkaal dowladeed lagu dilay oo ka dhan ah masuuliyiin dowladeed iyo kuwa ismaamulka Oromia ee heshiiska shaaciyay.
About The Author
