Warar soo baxaya ayaa muujinaya in dowladda saliibiyada Mareykanka laga yaabo in ay si toos ah ugu biirto dagaalka u dhexeeya Yahuudda iyo dowladda Shiicada ah ee Iiraan, iyadoo xaaladda bariga dhexe_na ay sii cakirmeyso.
Sida saaka ay soo tebiyeen qaar ka mid ah waraahinta Maraykanka, Donald Trump ayaa shir deg-deg ah oo socday muddo 2 saacadood ah ku qabtay Aqalka Cad, kaas oo lagu gorfayanayay in Mareykanku ku biiriyo weerarrada milatari ee Yahuuddu ku bartilmaameedsanayso xarumaha nukliyeerka Iiraan.
Ilo xogogaal ah oo kala duwan ayaa warbaahinta Maraykanka ee CBS u sheegay in madaxda ugu sarseysa dalkaasi ay ku kala aragti duwan yihiin ku biiridda dagaalka ka dhanka ah Iiraan isla markaana qaar badan oo ka mida xubnaha xagjirka ah ee aadka ugu dhaw Donald Trump ay rabaan in dagaalka lagu biiro.
Lindsey Graham oo ah xildhibaan ka tirsan xisbiga Jamhuuriga kana mida madaxda ugu saameeynta badan dalkaas, aadna ugu caanbaxay neceybka uu u qabo diinta Islaamka ayaa sidoo kale si cad u muujiyay taageerrada uu u hayo in Mareykanku si buuxda ula safto Yahuudda.
Xildhibaanka ayaa war uu ku qoray bartiisa baraha bulshada ku yiri: “Waxaan u dhow nahay go’aan taariikhi ah… Madaxweyne, fadlan si buuxda u garab istaag Israa’iil si loo dhameystiro howsha.”
Hadalkan ayaa imaanaya iyadoo xiisadda gobolku ay si weyn u cakiran tahay, kaddib weerarro iyo duqaymo is-daba joog ah oo labada dhinac ay is-waydaarsanayaan.
Saraakiil Maraykan ah oo aan magacyadooda la shaacin ayaa sidoo kale warbaahinada kala duwan ee waddankaasi u sheegay in qorshayaal difaac iyo weerar labadaba la diyaariyay, haddii la gaaro go’aanka ku biirista dagaalka.
Taliska ciidamada saliibiyiinta Mareykanka ee bariga dhexe ee (CENTCOM) ayaa lagu soo warramayaa in uu kordhiyay diyaar-garowgiisa, iyadoo maraakiib dagaal iyo diyaarado dheeraad ah loo diray gobolka.
Dowladda Mareykanka ayaan wali si rasmi ah u shaacin in ay si toos ah uga qaybqaadaneyso dagaalka, balse hadallada saraakiisha iyo siyaasiyiinta qaarkood ayaa muujinaya in cadaadis ballaaran uu saaran yahay maamulka, si ay u muujiyaan taageero aan shuruud lahayn oo ay siiyaan Yahuudda, xilli cabsi laga qabo in dagaalku uu kusii fido dalal kale oo gobolka ah.
Dowladda Iiraan ayaa dhankeeda sheegtay in dal walba oo ka qeyb-qaata dagaalka ay kula jirto Yahuudda uu noqon doono hadaf sharci ah.
Safiirka Iiraan u fadhiya urur gaaleedka qaramada midoobay ee Geneva, ninka lagu magacaabo Cali Baxreyni ayaa sidoo kale u sheegay wakaaladda wararka ee Reuters in ay jawaab adag ka bixin doonaan haddii la xaqiijiyo in Maraykanku uu ku lug leeyahay weerarrada lagu soo qaaday Iiraan.
About The Author
