CHADEMA oo ah xisbiga ugu weyn mucaaraadka Tanzania, ayaa Jimcihii shalay shaaciyey in ku dhawaad 700 oo qof lagu dilay saddex maalmood gudahood, kadib markii ay dhaceen mudaharaadyo rabshado wata oo ka dhashay doorasho muran dhalisay oo Arbacadii lasoo dhaafay ka dhacday dalkaas.
Mudaaharaadayaal gadoodsan ayaa waddooyinka isugu soo baxay tan iyo Arbacadii, iyagoo ka caraysan cabashooyin la xiriira caburin baahsan iyo in tartanka doorashada laga reebay laba ka mid ah musharrixiinta ugu waaweyn ee ka soo horjeedda haweenayda madaxweynaha ka ah dalkaasi ee Saamiya Suluuxu Xassan.
Sida ay wararku tibaaxayaan goobihii codaynta ayaa markaliya isku bedelay fowdo, iyadoo dadweyne aad u badan ay isugu soo baxeen waddooyinka Daaru-Salaam iyo magaalooyin kale, iyagoo jeex-jeexay sawirrada madaxweynaha, isla markaana weeraray saldhigyada booliska iyo goobaha codbixinta. Tani waxay keentay in la xiro internet-ka iyo in Bandow lasoo rogo xilliyada habeenkii.
Ilo amni ayaa u sheegay wakaladda wararka AFP in ay maqleen warar sheegaya in dhimashada guud ay kor u dhaaftay 500 (Shan boqol) oo qof, isla markaana guud ahaan dalka oo dhanna ay noqon karto tirada dhimashadu 700 ilaa 800 oo qof.
John Kitoka oo ah afhayeenka xisbiga laga mamnuucaay doorashada ee Chadema (Jaadhama), ayaa warbaahinta u sheegay in tirada dhimashadu ay ka badan karto 700 oo qof. Maadaama dilal ay hor leh ay dhici karaan xilliyada habeenkii ee bandowdu jirto.
Madaxweynaha Tanzania, Saamiya Xassan oo xukunka la wareegtay 2021-kii kadib markii uu geeriyooday hoggaamiyihii ka horreeyey, ayaa lagu soo warramayaa in guul weyn ay ka gaartay doorashadii qabsoontay maalinnimadii Arbacada, iyadoo heshay codadka in ka badan 97% , sida ay subaxnimadii maanta oo Sabti ah ku dhawaaqeen guddiga doorashooyinka ee Tanzaniya.
Waxa loogu yeero beesha caalamka ayaa si weyn uga walaacsan qolqolatoonka kasoo cusboonaaday Tanzaniya, kuwaas oo sidoo kalena la sheegay in boqollaal qof oo kalena ay ku dhaawacmeen iyadoo dowladdu ay tirada dhimashada ku tilmaantay mid la buubuuniyey isla markaana ganafka ku dhufatay dhaliilaha loo jeediyey.
About The Author
