Wararka laga helayo degmada Xamar Weyne ee magaalada Muqdisho ayaa sheegaya in barqanimadii maanta qarax aad u xoogan uu ka dhacay Degmada Xamarweyne ee magaalada Muqdisho kaas oo lala eegtay Saraakiil iyo shaqaale ka tirsan DF.
Ilo wareedyo lagu kalsoon yahay iyo dad goobjoogeyaal ah ayaa warbaahinta u sheegay in qaraxan uu ka dhacay Goob lagu magacaabo ‘Baar Banaadir’ uu ku taalla agagaarka xarunta maamulka gobolka Banaadir, halkaas oo ay joogeen Saraakiil iyo shaqaale ka tirsan DF.
Sarkaal ka tirsan Xarakada Mujaahidiinta Al-Shabaab oo la hadlay Idaacadda Andalus ayaa sheegay in qaraxa lala eegtay isku imaatin ay ku sugnaayeen Saraakiil ka tirsan Maamulka gobolka Banaadir, kuwa Nabad-sugida, iyo qaar ka mid ah shaqaalaha DFS.
Warar hordhac ah oo aan helnay ayaa xaqiijinaya dhimashada ugu yaraan 8 xubnood oo ka tirsan DF iyo dhaawaca tiro intaas ka badan, waxaana suuragal in khasaaruhu uu intaas ka sii bato.
Qaraxan ayaa imaanaya iyadoo todobaadkii hore sidan oo kale qarax xoogan oo loo adeegsaday gaari laga soo buuxiyey walxaha qarxa lala eegtay goob lagu magacaabo ‘Baar Itaaliya’ oo ku taalla agagaarka xabsiga Godka Jilacow, halkaas oo lagu dilay 7 sarkaal oo uu ku jiray taliyihii hore ee xabsigaas.
Xarakada Mujaahidiinta Al-Shabaab ayaa todobaadyadan xoojiysay weerarada qorsheysan ee lagu beegsanayo bartilmaameedyada ku yaalla degmooyinka iyo xaafadaha aadka loo ilaaliyo amnigooda ee ku yaalla magaalada Muqdisho.
About The Author
