Khasaare kala duwan ayaa dhashay qaraxyo gaarayay illaa labo qarax oo lagu beegsaday xarumo laga raaco basaska oo kuyaal galbeedka magaalada Qudus ee caasimadda Filistiiniyiinta, Halkaas oo ay ku sugnaayeen dadka Yahuud ah.
Ilo wareedyo dhanka maleeshiyaadka booliska Yahuudda ayaa xaqiijiyay in qaraxa koowaad uu ka dhacay gudaha goob basaska laga raaco oo kutaal galbeedka magaalada Qudus, Halka qaraxa labaad na uu beegsaday xarun kale oo iyana kutaal agagaarka deegaanka Ramoot ee dhaca waqooyi galbeed magaalada Qudus Al-shariif.
Warbaahinta ku hadasha afka Yahuudda waxay xaqiijisay in qaraxyadan is xig-xigay uu ku dhintay 1 qof oo Yahuudi ah halka 22 kalena ay dhaawacmeen, Dhaawacyada 4 ka mid ah ayuu boolisku sheegay inay halis ku jiraan.
Saraakiisha dhanka ammaanka u qaabilsan maamulka gumeystaha Yahuudda ayaa qaraxyada ka dib xiray dhamaan waddooyinka ka agdhow xarumaha ay qaraxyadu ka dhaceen, Iyagoo maleeshiyaadka booliska amar ku siiyay inay baaritaanno ka sameeyaan xaafadaha magaalada Qudus.
About The Author
