Caadif Saalim, oo ahaa safiirkii hore ee Masar u fadhiyay Tal’abiib, ayaa shaaca ka qaaday in maamulka Sahaayuuniyadu uu ku hawlan yahay sidii uu saldhig milatari uga samaysan lahaa Soomaaliya, arrintaas oo khatar weyn uu ku tilmaamay.
Waxa uu sheegay in Talaabiib ay adeegsanayso xeelado ku dhisan xoog iyo cabsi-gelin, iyadoo doonaysa inay gebi ahaanba tirtirto qaddiyadda Falastiin, sidaas darteedna xaaladdu ay kasii dari doonto haddii aan laga hortagin.
Caadif Saalim, ayaa caddeeyay in Maraykanku uu isku dayayo inuu Itoobiya ka dhigo quwadda gobolka ee Geeska Afrika, Yahuuddana uu ka dhigo tan Bariga Dhexe, isagoo ku nuuxnuuxsaday in dedaalka Sahaayuuniyada ee ah inay saldhig ku yeelato Soomaaliya ay tahay arrin aad u khatar badan.
Hadalladan ayuu safiirku ka jeediyey dood-cilmiyeed bille ah oo ay soo qabanqaabisay Guddiga Arrimaha Carabta iyo Dibadda ee Ururka Saxafiyiinta Masar, oo uu guddoomiye ka yahay qoraaga saxafigana ah ee Maxamed Al-Sayid Al-Shaadli, taasoo ciwaankeedu ahaa: “Saamaynta Iska hor-imaadyada Gobolku ku leeyihiin Mustaqbalka Bariga Dhexe.”
Saalim waxa uu tilmaamay in Sahaayuuniyadu ay hadda wajahayso caqabado waaweyn, oo ay ugu horreeyaan xayiraadaha saaran maraakiibta ee ka dhashay dhaqdhaqaaqyada Xuutiyiinta, taasoo culeys weyn ku ah gaadiidka hubka iyo diyaaradaha aan duuliyaha lahayn.
Sidoo kale, wuxuu xusay in Yahuuddu ay la daalaa-dhacayso burburka ku yimid waaxdii dalxiiska, oo dakhli badan kasoo geli jiray, iyo sidoo kale kororka ku yimid tahriibka iyo cararka Yahuud fara badan oo isaga baxaya dhulkii ay xoogga ku haysteen.
Digniintan ka soo yeertay safiirka ayaa imaanaysa xilli ay muddooyinkan dambe si weyn isu soo tarayeen wararka sheegaya in maamulka Talaabiib uu ku hawlan yahay wada-hadallo ku saabsan sidii uu saldhig milatari uga dhisan lahaa deegaannada uu ka arrimiyo maamulka Riddada Somaliland.
About The Author
