Inta la xaqiijiyay ugu yaraan saddex qof oo laba ka mid ah ay yihiin saraakiil ka tirsan dowladda Kenya ayaa ku dhaawacantay shil diyaaradeed oo ka dhacay garoonka diyaaradaha ee magaalada Wajeer ee dhulka NFD ee ku hoos jira gumeysiga saliibiyiinta Kenya.
Warbaahinta maxalliga ah ayaa sheegtay in dadka shilkaasi ku dhaawacmay uu ka mid yahay nin duuliye ah, halka labada kalena ay yihiin saraakiil Kenyaan ah oo agabka kasoo qaaday magaalada Wajeer, kuwaas oo kusii jeeday deegaanka Arbajahan ee isla gobolka Wajeer.
Diyaaradda shilka la gashay saraakiisha Kenyaanka ah oo ahayd mid yar ayaa la sheegay inay soo dhacday wax ka yar hal daqiiqo markii ay ka duushay garoonka diyaaradaha ee Wajeer, lamana xaqiijin sababta rasmiga ah ee keentay shilka.
Sawirro laga soo qaaday goobta uu shilku ka dhacay ayaa muujinayay burburka soo gaaray diyaaradda, saraakiisha dhaawacantay iyo duuliyaha ayaana loola cararay xarun caafimaad, sida uu xaqiijiyay sarkaal Kenyaan ah.
“Weli ma garanayno waxa sababay shilka, laakiin dhibbanayaashu waxay ku jiraan isbitaal, xaaladdooduna waa lala tacaalayaa,” ayuu yiri sarkaalka hadlay.
About The Author
