Kooxaha muqaawamada Falastiin ee ka howlgala marinka Gaza, ayaa sarkaal ciidan oo ka tirsan Sahaayinada Yahuudda iyo saddex askari oo kale ku dilay Jabaaliya oo ka mid ah goobaha uu ka socdo xasuuqa ka dhanka ah dadka muslimiinta ah.
Warbixin uu soo saaray taliska ciidamada gumeystaha ayaa lagu xaqiijiyay in ugu yaraan 4 askari oo uu ku jiro sarkaal sare lagu dilay dagaallo xooggan oo ka dhacay mandiqadda Jabaaliya ee dhacda waqooyiga Marinka Gaza, halkaas oo sahyyniyadu muddo bil ku dhow ka wado olole xasuuq iyo isir sifayn ah.
Sarkaalka la dilay ayay magaciisa ku sheegeen Yehonatan Johnny Keren, kaasi oo da’diisu tahay (22 jir), kana tirsanaa saraakiisha sare ee Kumaandooska Yahuudda, iyo askarta kale oo lagu kala magacaabi jiray Sergeants Nissim Mittal oo 20 sano jir ah, Aviv Gilboa, oo 21 sano jir ah, iyo Naor Haimov oo isagana 22 jir ah, kuwaas oo dhammaantood ka tirsan cutubka 888-aad ee ciidanka gumeystaha.
Ciidamada Yahuuddu waxay sidoo kale bayaankooda ku sheegeen in sarkaal kale oo ka tirsan taliska ciidanka sahaayinada Yahuudda isla qaybtaas uu sidoo kale si xun ugu dhaawacmay, iska horimaadka labada dhinac ayaa ahaa mid culus oo ay dhinac socdeen qaraxyo culus, oo dhismeyaasha lagula duminayay ciidanka Sahaayinada.
About The Author
