Khasaare kala duwan ayaa ka dhashay shil aad u xoogan oo ka dhacay meel u dhow degmada Shaygoosh oo ka tirsan gobolka Qorraxay ee dhulka Soomaali galbeed, halkaas oo maalmihii dambe ay kusii badanayeen shilalka gaadiidka ee sababa dhimashada iyo dhaawaca.
Shilkan ayaa yimid, kadib markii uu rogmaday gaari nooca Buska ah ee ay dadku raacaan, wuxuuna ku qalibmay duleedka degmada Shaygoosh, waxaana la sheegay in uu kasoo baxay degmada Jigjiga ee xarunta dhulka Soomaali galbeed, isagoo kusii jeeday magaalada Wardheer.
Alle mahaddiis ma jirin wax dhimasho ah, balse 11 qof oo shan ka mid ah ay dhaawacyadoodu yihiin kuwa culus ayaa lasoo wariyay, halka lixda kalena ay yihiin kuwa fudud sida ay sheegeen dadka degaanku. waxaana aad usii daran baa la yiri dhaawacyada saddex qof oo ka mid ah dadkii Buska la socday.
14-ka bishii lasoo dhaafay ee Januray ayay ahayd markii shil xooggan oo ka dhacay duleedka magaalada Jidjiga ee dhulka Soomaali galbeed ay ku dhinteen ugu yaraan laba iyo toban qof, halka ay ku dhaawacmeen tiro intaas ka badan.
About The Author
