Inta la xaqiijiyay ugu yaraan 36 qof ayaa dhintay halka 19 kalena ay dhaawacyo kala duwan soo gaareen, kaddib markii ay shil xooggan ku galeen buur kutaalla gobolka Kashmiir ee dhacda waqooyiga galbeed waddanka Hindiya.
Shilkaan ayaa yimid ka gadaal markii gaari bas rakaab ah uu ku dul dhacay waddo buur ah oo kutaal mandiqadda Kashmiir, waxaana xogtan warbaahinta maxalliga ah u xaqiijiyay masuuliyiin ka tirsan dowladda Hindiya.
Shilkan ayaa si gaar ah uga dhacay deegaanka Asar ee hoostaga degmada Doda oo qiyaastii 149 KM dhanka koonfureed kaga beegan magaalada Srinagar oo ah caasimadda dhulka muslimiintu leeyihiin ee Kashmir, gaar ahaan qeybta Hindiya hoostagta, gaariga Buska ah ayaa ka ambabaxay degmada Kishtwar waxaana uu kusii jeeday magaalada Jammu.
“Bas ay saarnaayeen 55 qof ayaa maanta ka baxay waddada, wuxuuna ku dhacay dooxo , illaa hadda waxaan xaqiijinnay in 36 qof ay ku dhinteen shilkan naxdinta leh, 19 kalena ay ku dhaawacmeen. ” waxaa sidaas warbaahinta u sheegay mid ka mid ah saraakiisha Booliska Hindiya.
About The Author
