Wararka ka imaanaya dalka Itoobiya ayaa sheegaya in maanta uu shil xoog leh ka dhacay duleedka magaalada caasimadda ah ee Addis-ababa, halkaas oo ay ku nafwaayeen ku dhawaad 10 qof oo Itoobiyaan ah.
Booliiska Addis Ababa ayaa xaqiijiyay in shilkaasi baabuur uu si gaar ah uga dhacay degmada Akaki Kality ee dhacda duleedka Addis Ababa, halkaasina ay ku dhinteen ugu yaraan 9 qof, oo uu ku jiro ilmo saddex jir ah.
Warbaahinta maxalliga waxay xaqiijisay in sidoo kale shilkaasi ay dhaawacyo culus kasoo gaareen siddeed qof oo kale, waxaana dhacdadan ay timid kadib markii ay isku dhaceen gaadiid badan oo waddo mashquul badan marayay.
Sarkaal ka tirsan qaybta baarista shilalka, ayaa sheegay in shilku ka dhashay gaari Bas-ka nooca dadweynaha oo ka yimid aagga Xayle Garment uu si xun ugu dhacay gaari xamuul ah, taas oo Baska ku keentay in uu kaantaroolkiisa lumiyo kuna dhaco gaadiidka kasoo horjeeda.
Buska ayaa si gaar ah uga ugu dhacay gaariga yar ee Dolphin-ka loo yaqaan, waxayna warbixinnadu xaqiijinayaan in dhammaan dadka dhintay ee sagaal-ka xubnood ka kooban ee uu ku jiro darawalka ay saarnaayeen gaariga yar ee Basku ku dhacay.
Sawirro lagu baahiyay baraha bulshada ayaa muujinayay burburka baaxadda leh ee ka dhashay shilkan baabuur, waxaana goobta ku burburay gaariga yar ee dadku ku dhamaadeen, waxaa iyana uu burbur gaaray gaadiid kale oo ku socdaalayay waddada uu shilku ka dhacay.
About The Author
