Faahfaahinno dheeraad ah ayaa kasoo baxaya shil baabuur oo khasaare kala duwan gaystay, kaasi oo saacadihii lasoo dhaafay ka dhacay gudaha Kenya.
Shilkan baabuur ayaa yimid kaddib markii uu rogmaday gaari nooca Baska dadweynaha oo kasoo baxay magaalada caasimadda Nairobi kuna sii jeeday dhanka magaalada Gaarissa ee dhulka NFD.
Ilo wareedyo maxalli ah ayaa soo sheegay in gaariga uu si gaar ah shilka ugu galay meel u dhow magaalada Mwingi ee ku teedsan waddada dheer ee isku xirta Gaarisa iyo Nairobi, baabuurka ayaana shilka galay markii uu wadaha koontaroolka lumiyay.
Dhowr qof oo Soomaali ku jiraan ayaa lasoo wariyay inay ku dhaawacmeen shilkan baabuur, kuwaas oo dhaawacyadoodu yihiin kuwa daran, waxaana ka mid ah dadka dhaawacmay nin magaciisa lagu sheegay Shiikh Nuur, kaasi oo ka go’ay gacanta bidix, halka gabar kale oo Soomaali ahna ka go’day gacan.
Dhanka kale, shil baabuur oo ka dhacay meel u dhow Kikopey, oo ka tirsan Gilgil oo kutaal jidka dheer ee xiriiriya ismaamullada Nakuru iyo Nairobi, ayaa sababay dhimasho iyo dhaawac badan.
Inta la xaqiijiyay waxaa shilkan ku dhintay ugu yaraan 16 qof, waxaana uu shilka yimid markii gaari rakaab ah oo kusii jeeday Nakuru uu si toos ah ugu dhacay gaari kale oo jiho kale kusii jeeday.
Taliyaha booliiska ismaamulka Nakuru, Emmanuel Opuru, ayaa sheegay in markii uu shilku dhacay kaddib ay isla goobta ku dhinteen 13 qof, halka 3 kale oo dhaawacyo daran qaba loo qaaday cisbitaalka, wallow dib laga soo xaqiijiyay dhimashadooda.
About The Author
