Warar dheeraad ah ayaa kasoo baxaya iska hor’imaadyo xooggan oo maleeshiyaad kawada tirsan dowladda Federaalka Soomaaliya ku dhaxmaray gudaha magaalada Muqdisho.
iska hor’imaadyada oo ahaa kuwa muddo saacada ah socday ayaa ka dhacay dhowr xaafadood oo katirsan degmada Hodon ee bartamaha gobolka Banaadir.
Ciidamo katirsan kuwa melleteriga ayaa isku dayay in ay gudaha ugaleen saldhigga Jeneraal Gorden oo dowladda Imaaraatka ay gacanta ku heyn jirtay si ay uboobaan hub iyo gaadiid dagaal oo halkaasi yiillay balse waxay iska caabin kala kulmeen ciidamo ilaala ka hayay saldhigga.
Dagaalka oo ay qeyb galeen gaadiidka dagaalka ee Tikinada loo yaqaan ayaa saameyn ku yeeshay xaafado ay kamid yihiin aagga Warshadda Caanaha, Kulliyadii Jaalle Siyaad ,Tarabuunka illaa iyo dhabarka dambe ee isbitaalka Digfeer.
Ilo wareedyo ayaa sheegaya in xalay fiidkii illaa iyo saqdii dhexe ay maleeshiyaad hubeysan daabulanayeen hubkii ku xaraysnaa Bakhaarada saldhiggii Imaaraatku ka baxay waxayna qaadeen saanado melleteri iyo agabyo kale balse maanta duhurkii ayay isku dayeen in ay qaataan gaadiid Cabdi Bilayaal ah oo saldhigga yiillay taas oo keentay dagaal.
Warar kordhac ah waxay sheegayaan in ugu yaraan 4 qof oo katirsan dhinacyadii dagaallamay iyo qof rayid ah ay ku dhinteen dagaalladii cuslaa ee maanta dhacay.
About The Author
