Wararka ka imanaya gudaha dalka Itoobiya ayaa sheegaya weerarro culus oo khasaare xooggan geystay oo usbuucii lasoo dhaafay maleeshiyaadka Fano iyo ciidanka dawladda Xabashida Itoobiya ku dhex-maray deggaanno ka tirsan gobolka Amxaarada
Weerarradan oo ka kala dhacay deggaanno ay ka mid yihiin waqooyiga Shawa, bariga iyo galbeedka Gojjam iyo sidoo kale deggaannada Gondar, Armachicho, Genete iyo Ajire Janora ayaa lagu soo warramayaa in khasaare culus lagu gaarsiiyey ciidanka Xabashida Itoobiya.
Sida ay tebinayso warbaahinta maxalliga ah ee Itoobiya sida Ethio Focus iyo Ethio News ayaa sheegaya in dagaalladan oo qaarkood socday dhowr maalmood oo xiriir ah dhegta dhiigga loogu daray boqollaal askari oo ka tirsan ciidanka dowladda iyo mas’uuliyiin hoos-tagayay maamulka Abiy Axmed.
Geesta kale ururka Xoraynta Oromada ee magacooda loosoo gaabiyo OLA, ayaa lagu eedeeyey xasuuq loo geystay dad rayid ah oo ka dhacay deegaanka Kamashi oo hoos-taga gobolka Benishangul Gumuz ee galbeedka Itoobiya.
Ugu yaraan 16 qof oo rayid ah oo carruur ay ku jirto ayaa la dilay, 14 kalena waa la dhaawacay, kadib markii koox hubaysani ay deggaaankaasi weerar ku qaadday Arbacadii lasoo dhaafay, sida dad deggaanka ah u sheegeen warbaahin laga leeyahay dalka Ingiriiska.
Madaxa xafiiska nabadgalyada iyo amniga gobolka, oo weerarkaasi ku eedeeyay kooxda OLA, ayaa sheegay in kooxdan oo hubeysani ay gudaha u gashay xaafadda Anger Miti ee degmada Mizhenga, halkaasna ay ku laayeen dad rayid ah, oo ay ku jireen 6 qof oo caruur ah.
Dalka Itoobiya ayaa marba marka kasii dambaysa ay xaaladdiisa amni kasii daraysaa, waxaanay dhacdadani noqonaysaa tii labaad ee isla aaggagaasi ka dhacda muddo ka yar laba bilood. Waxaana taas sii dheer afduubyada xarkaha goostay ee kusoo badanay gudaha Itoobiya.
About The Author
