Wararka ka imaanaya gobolka Benishanghuul ayaa sheegaya in ay dhinteen dad ka badan 100 ruux kadib markii maleeshiyaad hubaysan ay dhowr jiha ka weerareen tuulooyin ay dadkaasi deganaayeen.
Hay’adda Xuquuqul Insaanka u qaabilsan dowladda Itoobiya ayaa sheegtay in ugu yaran 100 ruux lagu dilay weerar ka dhacay deegaanka Buuleen oo ka tirsan Beshanghuul.
Maleeshiyaad qaab deegaameed u abaabulan ayaa xoog ku galay deegaanka kadibna waxay xasuuqeen dad beeralay ah oo badankood kasoo jeeda qowmiyada Amxaarada.
Goobjooge ka badbaaday wixii ka dhacay Buuleen ayaa warbaahinta usheegay in uu indhihiisa ku arkay meydadka tobanaan ruux oo lagu guray god ka qodan gurigiisa, qof kale oo deegaanka ah ayaa isna sheegay iyo tobanaan maleeshiyaad hubaysan ay xoog kusoo galeen degmada ayna dileen dad ka badan 20 ruux.
Dadka laxasuuqay badankood waxaa haleeshay rasaas ka dhacaysay qoryaha boobayaasha ah ee ay ku hubaysnaayeen maleeshiyaadka kasoo jeeda gobolka lagu magacaabo Matakel oo katirsan ismaamulka Benishanghuul.
Haweenay kalkaaliso caafimaad ka ah degmada uu xasuuqa ka dhacay ayaa xaqiijisay in ay latacaalayaan dhaawacyada 38 ruux oo dhammaantood jirkooda ay rasaas ku dhacday balse aysana awoodin qaabilaadda dhaawacyo hor leh sababa laxiriira daawooyinka oo gabaabsi ka ah xaruntooda.
Mas’uuliyiin ku sugan mandiqadda waxay sheegeen in ay ogaadeen heybta qolyaha weerarka geystay ayna wadaan baaritaanno balse waxay diideen in ay bixiyaan tafaasiil intaas ka dheer.
Gobolka Matakel ayaa bishii lasoo dhaafay martigeliyay weeraro ay ku dhinteen 70 ruux oo badankood kasoo jeedo dadka Amxaarada ah ee lagu deegaameeyay dhulkan hodonka ku ah beeraha.
Dhalinyaro is abaabulay oo kasoo jeeda Bishanghuul ayaa fulinaya weeraradan wuxuuna ujeedkoodu yahay in Amxaarada ay ka barakiciyaan dhulkooda oo xoog lagu dajiyay.
About The Author
