Kooxda shiicada Xuuthiyiinta Yeman ayaa bayaan ay soo saareen ku sheegay in duqayn dhanka cirka ah oo kaga timid maamulka Yahuuda ay ku waayeen ra’iisul wasaare taabacsanaa kooxdaasi iyo tiro wasiiro ah oo la joogay.
Warsaxaafadeedka kooxdan ayaa lagu sheegay in weerarku dhacay khamiistii lasoo dhaafay, ciidanka Yahuudduna beegsadeen goob uu ku sugnaa Ra’iisul wasaaraha kooxdaasi iyo wasiiro kale, goobta ay duqayntu ka dhacday ayay warsaxaafadeedkaan ku sheegeen in lagu soo bandhigayay sidoo kalena lagu qiimeynayay waxqabadka sannadkii hore ee xukuumadda ay sameysteen kooxda Xuuthiyiinta.
Axmed Ghaalib Al-raxwi oo Xuuthiyiinta ugu magacownaa ra’iisul wasaaraha iyo tiro kale oo wasiiro ah oo aysan maga_dhabin ayay sheegeen inay ku dhinteen duqaynta, halka xubno kalena ay soo gaareen dhaawacyo isugu jira kuwa fudud iyo kuwa culus.
Duqaynta ka dhacday Yeman ee lagu dilay Ra’iisul wasaaraha xukuumad ay sameysteen kooxda Xuuthiyiinta ayaa qayb ka ah weerarro dhanka cirka ah oo ay maalmihii lasoo dhaafay is dhaafsanayaan kooxda uu fadhigeedu yahay magaalada Sanca iyo maamulka Yahuudda ee xoogga lagu dajiyay Tal-abiib.
About The Author
