Markii ugu horreysay maleeshiyada shiicada Xuuthiyiinta ayaa xaqiijiyay in la dilay taliyihii guud ee ciidanka kooxdan, kaasi oo ku dhintay duqayn dhanka cirka ah oo uu fuliyay maamulka Yahuudda.
Kooxda Xuuthiyiinta Yeman ayaa warkan soo saartay maanta oo Khamiis ah, waxayna sheegeen in Muxammad Cabdulkariim Al-ghamari oo ahaa taliyihii guud ee ciidamada Xuuthiyiinta, wiil uu dhalay iyo qaar ka mid ah ilaaladiisa lagu dilay duqayn ay Yeman ka fuliyeen Maraykanka iyo Yahuudda intii lagu guda jiray weeraradooda ka dhanka ah gumeystaha.
Waxay sidoo kale kooxdan sheegtay in taliyaha guud ee ciidanka Xuuthiyiinta loo magacaabay Yuusuf Ismaaciil Xasan Al-madani, kaasi oo baddeli doona Al-ghamari oo ku baxay gacanta Yahuudda.
Yahuudda ayaa bishii Juun ee sannadkan shaacisay inay duqayn dhanka cirka ah ku beegsatay taliyaha ciidanka maamulka Xuuthiyiinta, duqayntaasi oo ka dhacday magaalada caasimadda u ah Yeman ee Sanca ayay sheegeen in lagu beegsaday goob ay ku kulansanaayeen hoggaanka ugu sarreeya ee ciidanka Xuuthiyiinta, wargaysyada Yahuudda ayaana xilligaas sheegay in duqayntaas lagu dilay Al-ghamari.
Kooxda Xuuthityiintu waxay ku goodiyeen inay sii wadi doonaan weerarada ay ku hayaan gumeystaha, waxayna sheegeen in uu gumeystuhu heli doono jawaab ku habboon oo ka dhan ah dambiyadiisa.
About The Author
