Xilli xiisadda ka dhex aloosan Itoobiya iyo Eretriya ay cirka isku sii shareertay, ayaa waraysi cusub oo R/Wasaare Abiy Ahmed uu siiyey telefishanka Itoobiya ku iftiimiyey damacooda ku aaddan mustaqbalka dhow iyo halka uu daaran yahay, isaga oo sheegay inay si fudud ula wareegi doonaan dekedda Casab ee dalka Ereteriya.
Gaal Abiy Axmed ayaa si cad u shaaciyey in Itoobiya ay ku khaldantay wax uu ku sheegay ka-tanaasulka dekedda Casab ee ku taalla dalka Eretariya, isla markaana ay dhawaan dib ka sixi doonaan khaladkaasi dhacay.
“Waxaan joognay Badda Cas ilaa 30 sano ka hor. Joogitaankaasi wuxuu ahaa taariikh dhaw oo shalay ahayd.” Ayuu Abiy Axmed ku yiri waraysigiisan oo lala yeeshay isagoo ku sugan meel u dhow biyo-xireenka webiga Niil ee uu muranka badani ka taagan yahay.
Raysal-wasaaraha Itoobiya oo hadalkiisa sii wata isla markaana gef ku tilmaamaya in Itoobiya ay kusoo dhacdo xeeb la’aan oo ay waydo dekedda Casab ayaa yiri “Khaladkii shalay la sameeyay, berrina waa la sixi doonaa, mana aha wax adag,”.
Hadallada Abiy Axmed oo la filayo inay uga sii dari doonaan xiisadda ayaa imanaya maalmo kadib markii madaxa Xiriirka Dibadda iyo Iskaashiga Militariga ee Wasaaradda Difaaca ee Itoobiya, Jeneraal Teshome Gemeju, uu shaaciyey in dekedda Casab ay iyagu leeyihiin isla markaana ay u diyaar-garoobeen sidii ay usoo ceshan lahaayeen.
Eretriya ayaa hadalkan kasoo yeeray sarkaalka Itoobiyaanka ah ku tilmaantay baaq dagaal iyo bilawga qolqolotooyin hor leh oo uu geli doono gobolka Geeska Afrika, waxaanay ku sifeeyeen Weerar iyo dagaal toos ah oo loola soo bareeray, taas oo laga dhaxli doono ayay yiraahdeen khasaare baaxad leh.
Gebi-dhacleynta damaca badeed ee Itoobiya ayaa haatan hadal-hayntiisu u badan tahay dhinaca Eretariya, balse waxa hubaal ah in marnaba aanay ka tanaasulin heshiiskii xaaraanta ahaa ee ay la gashay maamulka gaallo-raaca ah ee Somaliland, kaas oo loogu saxeexay qaadashada qaybo ka mida xeebaha waqooyi ee dalka Soomaaliya.
About The Author
