Inta la xaqiijiyay saddex askari oo Ameerikaan ah ayaa la dilay, ugu yaraan 24 kalena waa la dhaawacay, ka gadaal markii lagu beegsaday weerar loo adeegsaday diyaarad Drone ah oo lagu qaadday saldhig yar oo ciidamada Maraykanku ku leeyihiin dalka Urdun.
Saraakiil Ameerikaan ah ayaa xogtan u xaqiijiyay shabakada CNN, waana markii ugu horraysay tan iyo markii uu billowday dagaalka ka socda Gaza, oo mandiqadda loo bixiyay bariga dhexe lagu beegsado laguna dilo ciidamo Maraykan ah.
Taliska dhexe ee cidamada Mareykanka ee loo yaqaan Centcom ayaa qoraal kooban oo uu soo saaray maanta ku xaqiijiyay in saddex askari looga dilay, 25 kalena looga dhaawacay weerar ay fuliyeen diyaaradaha aan duuliyaha lahayn ee loo yaqaan Droneska’ oo lala beegsaday saldhig ciidan oo kuyaal waqooyi bari Urdun.
Shabakadda CNN waxay sheegtay in weerarkan lagu dilay askarta Maraykanka ah uu si gaar ah kaga dhacay saldhig kuyaal daarta 22-aad ee waddankaasi Urdun oo u dhow xuduudka Suuriya, waxaana lala xiriirinayaa in uu ka yimid dhanka kooxaha taabacsan Iiraan ee Maraykanka ku beegsada mandiqadda loo bixiyay bariga dhexe.
Dabayaaqada toddobaadkii tagay ayay ahayd markii la shaaciyay in inka badan 158 weerar lagu qaaday ciidamo ka tirsan Mareykanka iyo xulafadiisa oo ku sugan waddamada Ciraaq iyo Suuriya.
About The Author
