Iska hor’imaadyada hubaysan ee u dhaxeeya maleeshiyada Fano iyo ciidamada Xabshida Itoobiya ayaa lagu soo waramayaa in ay sii xoogaysanayaan, iyadoo kooxda Fano ay sheegtay in ay dhegta dhiigga u dartay ku dhawaad 400 oo askari oo ka tirsan ciidanka dowladda.
Jabhadda Fano waxay xustay in askartan faraha badan ay ku xasuuqday dagaallo culus oo saddexdii maalmood ee ugu dambeeyey usbuucii lasoo dhaafay ka dhacay gobolka Wollega oo ka tirsan deggaanka Oromada.
Sida ay sheegtay Ethio News oo ah warbaahin maxalli ah oo si dhow uga warbixisa dhaq-dhaqaaqa Fano, taliska Wollega ee kooxda ayaa sheegay in dagaalyahanadoodu ay weerarro abaabulan ka fuliyeen shan jiho oo kala duwan oo ka tirsan degmada Kiremu ee Wollega, iyagoo dagaal culus la galay cutubyo ka tirsan militariga federaalka.
Taliska Fano ayaa sheegay in ay dileen ugu yaraan 280 askari, ayna qabteen 25 kale — oo ay ku jiraan laba taliye oo darajadoodu tahay Gaashaanle — waxayna gacanta ku dhigeen hub aad u badan, oo ay ku jiraan 290 qori AK-47 ah, hal qori oo Dhishiike ah, iyo afar qori oo ka mid ah noocyada culus ee lagu rakibo baabuurta.
Geesta kale, dagaalyahanada Fano ee ka hawlgala gudaha gobolka Axmaarada ayaa sheegtey horu-marro ballaaran oo maalmihii lasoo dhaafey ay ka sameeyeen deegaano ay ka mid yihiin Gojjam, Gondar, Shewa iyo Wollo.
Ilo-wareedyo laga soo xigtay dhinaca Fano ayaa sheegay in kooxdani ay weerar rogaal-celis ah ku qaadeen 11 jiho oo uu ka socday howlgal loogu magac daray “Memorial Gedebye”, oo loogu aarayay 11 qof oo rayid oo dhawaan ciidanka Xabashidu ay ku xasuuqeen gudaha magaalada Gedebye.
Maleeshiyada ayaa shaacisay in gulufkan cusub ee loogu aarayay dadka shacabka ah lagu dilay ugu yaraan 91 askari oo ka tirsan ciidanka Xabashida Itoobiya iyo weliba 11 sarkaal oo ka mid ahaa xisbiga Abiy Axmed ee loogu yeero Barwaaqo.
Dagaalladan u dambeeyey ee sida ba’an loogu wiiqay ciidanka Xabashida Itoobiya ayaa muujinaya fashilka ku yimid hawl-gal cusub oo dhowaan ay ku dhawaaqday dawladda federaalku, kuna muddaysnaa ilaa 7-da Luulyo, kaas oo ay sheegtay inay kusoo afjarayso maleeshiyaadka Fano.
About The Author
