Dagaalka u dhaxeeya ciidamada millatariga dowladda xabashida Itoobiya iyo maleeshiyaadka Fano ee ka socda Ismaamulka Axmaarada ayaa saamayn ku yeeshay isku socodka dadka iyo gaadiidka.
Dhowr qof oo wadeyaal ka ahaa gaadiid nooca xamuulka ayaa toddobaadkii lasoo dhaafay dil iyo afduub loogu gaystay mid ka mid ah goobaha aadka la isugu hayo ee gobolka Axmaarada, sida ay shaacisay warbaahinta maxalliga ah ee Itoobiya.
Ugu yaraan 16 qof oo ka mid ah darawallada gaadiidka xamuulka qaada ayaa la xaqiijiyay in lagu dilay weerar ka dhacay waddada dheer ee xiriira Goonder iyo Metema oo ah degmooyin dhaca gobolka Amhara, halka sidoo kalena isla waddadaasi lagu afduubtay dareewallo kael.
Barta Yeshoferoch Andebet oo ah mid u ololeysa badbaadada darawallada baabuurta xamuulka qaada ee Itoobiya oo dhan, ayaa isniintii lasoo dhaafay sheegtay in darwallada la dilay sidoo kalena, waxaana weerarka lagu dilay xubnahaasi lala xiriirinayaa kooxo burcad ah oo ka howlgala ismaamulka.
Warbaahinta gudaha waxay sheegtay in ragga weerarka gaystay ee burcadda lagu tilmaamay ay yihiin kooxo hubeysan oo u muuqda kuwa ka duwan Fano oo ah jabhad mucaarad hubeysan oo u taagan xoraynta dadka Axmaarada.
Dhinaca kale, urur gaaleedka Qaramada Midoobay ayaa shaaciyay in dil loo gaystay mid ka mid ah shaqaalaheeda ka howlgala waqooyiga Itoobiya, taas oo noqotay xubintii ugu horraysay ee sannadkan lagu dilay gobolka Amhara.
Warbixin 26-kii Juun kasoo baxday isku-duwaha gargaarka bini’aadantinimo ee urur gaaleedka QM ee Itoobiya ayaa lagu sheegay in dhaawac xooggan oo loo gaystay ay u dhimatay Mahelet Sitotaw oo ka mid ahayd shaqaalaheeda, si gaar ah waxay haweenaydan ugu dhimatay iska hor’imaad 20-kii Juun ka dhacay degmada Angot ee mandiqadda Wollo ee gobolka Amxaarada.
Qoraalka ayaa lagu xusay in dilkan uu ahaa shaqaalihii ugu horreeyay ee ka shaqeynayay arrimaha gargaarka oo isagoo shaqo ku jira lagu dilo gudaha Itoobiya sannadkan 2025. Waxay hay’addu si gaar ah u xustay in 10 kale oo shaqaale gargaar ah la dilay sanadkii 2024, kuwaasoo 8 ka mid ah lagu dilay gobolka Amxaarada.
About The Author
