Sheekh Cali Maxamuud Raage, afhayeenka Xarakada Mujaahidiinta Al-shabaab, ayaa shir jaraa’id oo uu caawa warbaahinta u qabtay kaga hadlay heshiiskii xaaraanta ahaa ee kooxda Riddada Somalia dowladda Riddada ah ee Turkiga ugu wareejisay maamulka badda Soomaaliya.
Sheikh Cali Maxamuud Raage ayaa sheegay in mujaahidiintu si adag uga soo horjeedaan, heshiis kasta oo lagu bixinayo badda, barriga iyo hawadeenna, heshiiska kooxda Riddada ah ee Xassan Gurguurte la gashay Turkiga ayuu sheekhu sheegay inay mujaahidiintu uga soo horjeedaan sidii ay uga soo horjeedeen heshiiskii uu Muuse Biixi la galay xabashida, isagoo tilmaamay in uusan jirin wax farqi ah oo u dhaxeeya Gurguurte iyo Muuse Biixi, oo labaduba ay yihiin murtadiin mid ah oo wada bixiyay bad Soomaaliyeed.
Sheekha oo sii hadlayay ayaa tilmaamay inaysan jirin cid xaq u leh inay badda barriga iyo hawada Soomaaliyeed ku wareejiso dowlado shisheeye, heshiisyadaasina yihiin kuwa xaaraan ah, baadhil ah, burcadnimo iyo boob aan geed loogu soo gamban ah oo loo gaystay khayraadka umadda Soomaaliyeed ee muslimiinta ah uu Allaah ku mannaystay.
Sheekha ayaa dhanka kale soo hadal qaaday dhibaatooyinka ay dowladda Turkigu ku hayso umada Soomaaliyeed ee muslimiinta ah, haddii ay ahaan lahayd mid dhaqaale iyo midka ashahaada la dirirnimo, sheekha ayaa sidoo kale ka hadlay kaalinta uu Turkigu kaga jiro duullaanka caalamiga ah ee saliibiyiintu ku hayaan umadda muslimka ah iyo sida uu gaalada asalka ah garab ugu yahay duullaankooda ka dhanka ah muslimiinta, Sheekh Cali ayaa farriin adag u diray cid walba oo usoo hanqal taagayso inay qabsato badda, barriga iyo hawada umadda Soomaaliyeed ee muslimka ah.
Sidoo kale waxa uu shiikhu baaq muhiima u diray umadda Soomaaliyeed, isagoo ugu baaqay inay fadhiga ka kacaan oo ay ka hortagaan murtadiinta iyo saliibiyiinta isa soo bahaystay ee doonaya inay baabi’iyaan diintooda, dadkooda iyo dalkooda.
Halkan Toos Uga Dhagayso Shirka Jaraa’id Ee Sheekh Cali.
Halkan Ka Dhagayso Shirka Jaraa’id Ee Sheekh Cali Dheere.
About The Author
