Dalalka Eritrea iyo Masar ayaa si adag u diiday in dalalka aan xeebaha lahayn ay door ku yeeshaan ammaanka biyaha Badda Cas, iyagoo xusay in maamulka marinka baddacas uu noqonayo mid ay hoggaan u yihiin waddamada xeebaha leh.
Mowqifkan ayaa la adkeeyey intii lagu jiray booqashada Wasiirka Arrimaha Dibadda ee Eritrea, Murtadka lagu magacaabo Cismaan Saalax, uu ku tegay Qaahira Axaddii. Halkaasna uu kula kulmay Madaxweynaha Masar, Murtad Cabdulfataax Al-Sisi, una gudbiyay fariin ka timid Madaxweynaha Eritrea, gaalka lagu magacaabo Isaias Afwerki, sida laga soo xigtay madaxtooyada Masar.
Booqashadan ayaa ku soo beegantay maalmo kadib markii Ra’iisul Wasaaraha Itoobiya, gaalka lagu magacaabo Abiy Axmed, uu u sheegay baarlamaanka dalkiisa in helitaanka badda Cas uu yahay arrin “noloshooda ku xiran,” . Hadalka Abiy Ahmed ayaa kusoo aaday iyadoo laga cabsi qabo in dagaal culus uu ka dhex qarxo Dalalka Eriteria iyo Itoobiya.
Dowladda Eritrea ayaa horey u diiday damacyada Itoobiya ee Badda Cas, iyadoo Wasiir Osman Saalax uu sheegay in dalkiisu la yaaban yahay waxa uu ugu yeeray “rabitaanka qaldan ee Itoobiya” iyo aragtideeda “duugowday.” Dowladda Eritrea waxay si cad u caddeysay in damaca Itoobiya uusan waafaqsaneyn xaqiiqda dhabta ah ee gobolka, isla markaana aysan aqbalaynin wax faragelin ah oo uga imaanaya dalalka aan lahayn xeebaha.
Xiisaddan la xiriirta marin-badeedka Badda Cas ayaa sii kordheysa, iyadoo ay muuqato in Itoobiya ay raadineyso waddo ay ku gaarto badda halka Eritrea iyo Masar ay difaacayaan mowqifkooda ku aaddan in maareynta Badda Cas ay tahay mas’uuliyadda waddamada xeebaha leh oo kaliya. Wali lama oga sida ay xaaladdani u sii socon doonto, balse waxaa la filayaa in arrintan ay sii xoojin doonto xiisadaha siyaasadeed ee gobolka.
About The Author
