Wararka ka imaanaya xuduudka u dhaxeeya Itoobiya iyo Suudaan, ayaa sheegaya in dagaallo lafa jabis ah ay dhexmareen maleeshiyaadka Fano ee fallaagada ah iyo kuwa millatariga ee Abiy Axmed.
Warbaahinta taageerta jabhadda mucaaradka hubeysan ee Axmaarada, waxay sheegtay in inka badan 100 askari oo ka tirsan ciidanka dowladda xabashida Itoobiya ay ku dileen dagaallo culus oo ka dhacay xuduudka u dhaxeeya waddamada Suudaan iyo Itoobiya.
Fano waxay sheegtay in dagaalladan ay ka dhaceen dhowr tuulo oo ku teedsan xadka dagaalladu ka socdaan, maleeshiyada fallaagada ah ayaa lasoo wariyay inay isku fidiyeen gacanta ku dhigeen deegaannada ku dhow xadka uu gobolka Amhara la wadaago Suudaan.
Ilo wareedyadu waxay intaas ku darayaan in maleeshiyaadka jabhadda kacdoonka millatari ku jirta ee Axmaarada ay sidoo kale millatariga Abiy Axmed ka eryeen waddada xiriira magaalooyinka Metemma iyo Gondar ee gobolkaasi.
Wararku waxay intaas ku darayaan in maleeshiyaadka Fano ee dagaalka kula jira xukuumadda Abiy Axmed ay la wareegeen gacan ku haynta macbarka muhiimka ah ee Qalabat ee dhaca xuduudka u dhaxeeya Suudaan iyo Itoobiya.
Waxay sheegashada Faano ee dilka inka badan 100 askari oo ka tirsanaa millatariga Abiy Axmed kusoo beegmayaan xili Suudaan ay shaacisay in ay xirtay xuduudka ay la wadaagto Itoobiya, gaar ahaan aagga magaalo xuduudkeeda Al-qalabat.
Waxay sidoo kale tani kusoo beegmaysaa xilli ay jirto cabsi xooggan oo ay qabaan madaxda dowladda Itoobiya, taasi oo ah in maleeshiyaadka jabhadaha mucaaradka ah ay qabsadaan caasimadda, waxayna taasi keentay in generaalka ugu sarreeya ciidanka Abiy Axmed uu ammar ku bixiyo in guutooyinka gaadiidka gaashaaman loo soo daabulo dhanka Addis-ababa, si ay mucaaradka hubeysan uga difaacaan magaalo madaxda.
About The Author
