Wararka ka imaanaya wadanka Itoobiya ayaa sheegaya in markale dagaallo lagu hoobtay ay ka dhax qarxeen kooxaha mucaaradka Amxaarada iyo ciidamada Federaaliga Xabashida ee uu hoggaamiyo Abiy Axmed.
Dagaallo saacado badan qaatay ayaa lagasoo sheegayaa gobolka Wallo ee dhaca waqooyiga ismaamulka Amhara halkaas oo ku dhowaad 2 sanadood xiriir ah ay loollano cusub ka socdaan.
War rasmi ah oo kasoo baxay jabhadda Amxaarada ee loo yaqaan Faano ayaa lagu sheegay in dagaallo dhacay saacadihii lasoo dhaafay lagu dilay saraakiil sarsare oo katirsanaa melleteriga itoobiya.
Miira Waadjo oo ah hoggaamiyaha jabhadda Faano ee mandiqadda Wallo ayaa xaqiijiyay in dagaalyahannadoodu ay dileen Korneyl Tiika Mekoobo Muxamed oo ahaa taliyihii qeybta 48aad ee ciidanka Itoobiya.
Sawirro ay mucaaradka Amxaarada faafiyeen waxaa ka muuqday sawirka taliyaha ladilay,aqoonsiyadiisa iyo qalabkii isgaarsiinta ee uu isticmaalayay balse sooma muujin meydka Korneyl tiika.
Madaxa siyaasadda ee jabhadda Faano ayaa isna xoojiyay sheegashada ku aaddan dilka taliyihii firaqada 48aad ee melleteriga Itoobiya, wararka ayaa intaas ku daraya in taliyaha lala dilay sarkaal 1 xidigle ah oo caawiye u ahaa taliyihii qeybta 48aad.
Dagaallo lagu hoobtay ayaa mucaaradka amxaarada iyo melleteriga Itoobiya ku dhaxmaray dhulka buuralayda ah ee isku xira Raaya iyo Weldiya halkaas oo ay marto waddo istiraatiiji ah oo aadda gobolka Tigreey iyo magaalada Koobo.
Sidoo kale jabhadda Faano ayaa sheegtay in dagaallada ka socda buuralayda gobolka Wallo ay ku dishay inkabadan 200 askari Itoobiyaan ah balse weli wax war ah kamasoo bixin ciidanka difaaca Xabashida oo ku aaddan guulaha ay mucaaradku sheeganayaan.
sawirro bishii lasoo dhaafay uu melleteriga Itoobiya ku faafiyay bartiisa Facebook ayuu kusoo bandhigay saanado hub ah oo uu ku sheegayo in ay ka qabteen maleeshiyadka jabhadda Faano islamarkaana ay sii daayeen gaadiid xamuul ah oo ay fallaagadu qafaasheen.
Sidoo kale talaadadii lasoo dhaafay jabhadda Faano ayaa weeraro loo adeegsaday bambaanooyin nuuca gacanta laga tuuro ah ku qaadday saldhigyo boolis oo kuyaal magaalada Bahardaar oo ah caasimadda ismaamulka Amhara.
Dalka Itoobiya waxaa ka socda dagaallo sokeeye oo gallaaftay nolosha kumanaan kun oo ruux waxaana khasaaraha ugu badan geysanaya diyaaradaha aan duuliyaha laheyn oo nidaamka Abiy Axmed uu kasoo iibsaday dowladda Turkiga.
About The Author
