Dagaallo culus oo u dhaxeeya ciidanka dowladda Xabashida Itoobiya iyo maleeshiyaadka Fano ayaa maalmihii lasoo dhaafay ka dhacay deggaannada Gojjam iyo Gondar oo dhammaantood ka tirsan gobolka Amxaarada.
Maleeshiyaadka Amxaarada ee ka hawl-gala deggaannada waqooyi ee gobolka Amxaarada, ayaa weerarro gaadmo ku beegsasday kolonyo ciidamo Itoobiyaan ah, xilli ay marayeen inta u dhexaysa labo deggaan oo lagu kala magacaabo Soroka iyo Abrahagira sida ay sheegtay Warbaahinta Ethiopian Media Service.
Ugu yaraan 103 askari oo ka tirsan ciidanka maamulka Abiy Axmed ayaa dhegta dhiigga loo daray, 50 askari oo kalena waa la dhaawacay sida ay sheegteen maleeshiyaadak Fano, gaar ahaan taliska loogu magac-daray Dejazamch Belay Zeleke..
Sidoo kale maleeshiyaadka Fano waxay shaaciyeen in guullo millateri oo la taaban karo ay kasoo hooyeen 3 hawl-gal oo isugu jira dagaallo toos ah iyo weerarro gaadmo ah oo khamiistii lasoo dhaafay ka dhacay deggaano ka tirsan Gojjam.
Madaxa xiriirka dadweynaha ee maleeshiyaadka Faano ee deggaanka Gojjam, oo hawl-galladan laga waraystay ayaa sheegay in weerar culus oo ay kula jarmaadeen fariisinno ay ciidanka dowladdu ku lahaayeen magaalada Dubrette lagu dilay ugu yaraan 45 askari oo ka tirsan ciidanka maamulka Addis Ababa.
Sarkaalkan u hadlay jabhadda Fano waxa kale oo uu ka dhawaajiyey in boqollaal qori ay ku qabsadeen dagaalkaasi. Iyadoo muuqaallo la faafiyey-na laga dheehan karo tiro askar ah oo ka tirsan ciidanka Xabashida Itoobiya oo nolosha lagu qabtay.
Magaalada Dembecha oo sidoo kale ku taal Gojjam, ayaa lagu go’doomiyey ciidanka Xabashida Itoobiya, kadib markii maleeshiyaadka Fano ay ka weerareen jihooyin kala duwan, waxaana lagu soo warramayaa in dagaalkaasi uu socday ku dhawaad 7 saacadood, sida uu baahiyey war-fidiyeenka Ethiopian Media Service.
Askar fara badan oo tirakoobkooda saxda ah aan la shaacin oo ka tirsan ciidanka difaaca Itoobiya ayaa dhegta dhiigga loo daray, halka gacanta lagu dhigay 16 askari, boqollaal qori iyo sidoo kale kumanaan rasaas ah sida uu warbaahinta u xaqiijiyey madaxa xiriirka dadweynaha ee maleeshiyaadka Faano ee deggaanka Gojjam.
Sidoo kale afhayeenkan u hadlay Fano waxa uu soo hadal-qaaday khasaaraha ka dhashay weerar kale oo maleeshiyaadka Fano ay ka fuliyeen deggaanka Amanuel oo ka tirsan Gojjam, kaas oo uu ka dhawaajiyey in uu jiro khasaare badan oo la gaarsiiyey ciidanka Abiy Axmed, lagana qabsaday in ka badan 100 qori.
Weerarradan xooggan ee usbuucii lasoo dhaafay ka dhacay gobolka Amxaarada ayaa kusoo aadaya iyadoo dhinaca gobolka Oromadana laga soo sheegayo weerar ay maalmo ka hor dabley hubaysani ku beegsadeen goob kaniisad ah oo ku taalla deggaan lagu magacaabo Arsi.
Kaniisaddan ayaa la weeraray xilli ay ku sugnaayeen ugu yaraan 20 qof oo Kiristan ah, kuwaas oo aan la shaacin jiritaanka wax khasaare ah oo soo gaaray. Waxaana weerarkan lagu tuhmay dabley aan ilaa hadda la aqoonsan oo maalmo ka hor dil ka geysatay degmo ka tirsan isla deggaankaasi oo magaceeda lagu sheegay Robe.
Maalinnimada Arbacadii lasoo dhaafay, afar nin oo hubaysan ayaa lasoo weriyey inay gubeen afar guri oo ku yaal degmada Robe, iyadoo dadka deggaanku ay u xaqiijiyeen warbaahinta Ethiopian Media Services in dableydu ay labadii sano ee la soo dhaafay afduubteen dad badan oo deegaanka ah, kuwaas oo nolol iyo geeri toona aan ilaa hadda lagu haynin.
About The Author
