Ugu yaraan 42 askari oo Itoobiyaan ah ayaa dhegta dhiigga loo daray maalmo uun kadib markii ciidamada Suudaan ee uu hoggaamiyo Janaraal C/Fataax Al-Burhaan ay kooxda murtazaqada ah ee RSF dib ugala wareegeen caasimadda dalka Suudaan ee Kharduum.
Askartan Itoobiyaanka ah ayaa lagu laayay dhowr goobood oo ku yaalla gudaha magaallada Kharduum, sida ay tebisay warbaahinta maxalliga ah ee Itoobiya. Inkastoo wax war ah oo dhacdadan ku saabsan aanu kasoo bixin dhinaca taliska ciidanka Suudaan.
Waxaa jiray warar sheegaya in ay jiraan calooshood-u-shaqaystayaal Itoobiyaan ah oo la safnaa kooxda Dacmu Sariic ee uu taageero maamulka riddada ee isu-tagga Imaaraadka. Sida ay baahiyeen qaybo ka mida warbaahinta gudaha ee dalka Sudan. walow warkaasi uu beeniyey maamulka Addis Ababa.
Sidoo kale warar ayaa sheegaya in sidoo kale ay jiraan murtazaqo kale oo ka tirsan kooxda TPLF oo iyaguna la safan kana barbar dagaallanta ciidanka Suudaan ee C/Fataax Al-Burhaan. Kuwaasoo lagu eedaynayo inay wadaan abaabul ka dhan ah Itoobiyaanka ku sugan magaallada Kharduum.
Isku soo wada duuboo dawladda Xabashida Itoobiya iyo weliba safaaradda ay ku leedahay dalka Suudaan ilaa hadda wax war ah kama aanay soo saarin 42-ka Itoobiyaanka ah ee la sheegayo in lagu dilay dalka Suudaan.
Wararkan ayaa kusoo aaday xilli ciidamada Suudaan ay si buuxda ula wareegeen gacan-ku-haynta caasimadda Suudaan ee Kharduum kadib dagaallo ba’an oo muddo usbuucyo ah qaatay oo ay la galeen maleeshiyaadka murtazaqada ah ee RSF.
About The Author
