Khasaare laxaad leh ayaa Yahuudda kasoo gaaray weerar cusub oo ciidanka cirka ee dowladda shiicada Iiraan ku qaadeen magaalooyinka xoogga lagu dajiyay dadka sahaayinada ah.
Weerarada oo ahaa kuwa ay Iiraan u adeegsatay sawaariikhda Riddada dheer iyo diyaarado nooca drone-ka, ayaa beegsaday dhismeyaal ku yaal Xayfa oo ah magaalo xoog lagu dajiyay dadka sahaayinada iyo sidoo kale Tal’abiib iyo magaalooyin kale iyo goobo kale oo ay ku jirto xarun cilmi-baariseed.
Warbaahinta Yahuuddu waxay sheegtay in weerarada dambe ee Iiraan xalay qaaday ay sababeen dhimashada ugu yaraan 4 xubnood oo Sahaayino ah iyo dhaawaca 240 kale, sidoo kale waxay weeraradu gaysteen khasaare culus oo u badan burbur soo gaaray tobanaan guri iyo dhismayaal.
Radiyaha Yahuudda ayaa sheegay in 4-ta qof ay ku dhinteen gantaallo Iiraan ay ku garaacday magaalooyinka Bat Yam iyo Roxofoot ee koonfurta Tal-abiib, halkaas oo sidoo kalena ku dhaawacmeen 140 kale oo sahaayino, Raadiyaha ayaa intaas ku daray in tobannaan guri iyo dhismayaal ay waxyeello xooggan ka soo gaartay gantaalada Iiraan ku beegsatay magaalada Bat Yam, waxaa jira bay tiri dad ku go’doonsan guryaha la beegsaday oo la baadigoobayo.
Yahuudda ayaa dhankeeda wada duqaymaha ka dhanka ah Iiraan, waxaa la wariyay inay beegsatay xarumo shidaal iyo wazaaradda difaaca Iiraan ee ku taal magaalada Tehran ee caasimadda ah, weerarada ayaa ah kuwa aad usii xoogeysanaya, waxayna dhinacyadu ku goodinayaan inay sii ballaarin doonaan weeraradooda.
About The Author
