Waxaa maanta oo Sabti ah la is dhaafsaday dufcadii labaad ee heshiiska xabad-joojinta ee u dhaxeeya kooxaha wax iska caabinta reer Falastiin iyo maamulka gumeystaha Yahuudda, waxayna dufcadan oo qayb ka ah wajiga koowaad ee heshiiska xabad-joojinta dhinacyadu is dhaafsadeen maxaabiis hor leh.
Kooxaha wax iska caabinra reer Falastiin ayaa maanta sii daayay ilaa 4 askari oo ah haween ka tirsan ciidamada maamulka Yahuudda, kuwaas oo lagu soo bandhigay xaflad heerkeedu sarreeyay oo maanta ka dhacday fagaaraha Falastiin ee marinka Gaza, sidoo kalena lagu baddalanayay ilaa 200 oo muslimiin Falastiiniyiin ah, kuwaas oo qaar ka mid ah ay kasoo jeedaan Jiidda Gaza ee halganka ka dhanka ah Yahuudda ku caan baxday.
Dhankiisa maamulka gumeystaha Yahuudda ee uu hoggaamiyo Netanyahu ayaa sii daayay ilaa 200 oo muslimiin ah oo si dulmi ah ugu xirnaa xabsiyadiisa, waxayna maxaabiistan kala gaareen Daanta galbeed iyo marinka Gaza.
Xaflado soo dhawayn ah ayaa maxaabiista oo 200 xubnood ka kooban loogu kala sameeyay magaalooyinka Ramallah iyo Gaza, marka aan eegno marinka Gaza waxaa maanta soo gaaray 16 xubnood oo maxaabiis ah, kuwaas si dulmi ah ugu xirnaa xabsiyada maamulka Sahaayinada, waxaana la geeyay cisbitaal kuyaal magaalada Khaan-yuunis, isku soo baxyo ay sameeyeen reer Gaza ayaa lagu soo dhaweeyay raggan oo ahaa kuwa maamulka Yahuudda lagu qasbay inuu sii daayo kaddib dagaal qaatay muddo 15 bilood.
Maxaabiista qaar ee Yahuuddu maanta sii deysay ayaa la ildarnaa xanuuno kala duwan la geeyay cisbitaallo kuyaal magaalada Khaan-yoonis, qaarkood waxay ku xukunnaayeen xabsi Daa’in waxaana maxaabiista ugu xabsiga dheer ka mid ahaa Raa’id Al-sacdi oo muddo 36 sano ah ku qaatay xabsiyada Yahuudda.
About The Author
