Taliska ciidanka millatariga Suudaan ayaa si rasmi ah u shaaciyay inay gacanta ku dhigeen guud ahaan gobolka Khartuum oo bilooyinkii lasoo dhaafay ay kula dirirayeen fallaagada uu Imaaraadku taageero ee RSF.
Afhayeenka ciidamada Suudaan, Nabiil Cabdullaahi Cali, oo akhrinayay bayaan kasoo baxay taliska ciidankiisa, ayaa sheegay in maleeshiyada Dacmu-sariic ay ka saareen gebi ahaanba magaalooyinka saddexda ah ee la isku dhaho gobolka Khartuum, gobolkana uu si dhamaysiran ugu soo dhacay gacantooda.
Bayaanka kasoo baxay ciidanka Suudaan ayaa nuqul ka mid ah waxaa lagu yiri “Waxaan maanta si rasmi ah ugu dhawaaqaynaa in wilaayada Khartum si buuxda looga sifeeyey joogitaanka maleeshiyada Doglo, isla markaana caasimaddeenna qaran laga nadiifiyey wasakhda fallaagada iyo kuwa taageersan,”, bayaanka oo sii socda waxaa lasii raaciyay :Waxaan xaqiijineynaa in gobolka Khartum uu noqday mid gebi ahaanba ka maran fallaagada.”.
Warsaxaafadeedka kasoo baxay ciidamada dowlada dabadhilifka ee Suudaan ayaa kusoo beegmaya xilli maanta isla taliskaan uu shaaciyay in ciidankooda ka taqadumayeen koonfurta iyo galbeedka Umu-durmaan.
La wareegitaanka gobolka Khartum ee ciidamada millatariga ayaa ka dhigan guul kale oo usoo hoyaray ciidamada Suudaan iyo jab xoog leh oo la gaarsiiyay maleeshiyada uu Imaaraadku baritaaro ee Janjawiidka, kuwaas oo bilooyinkii lasoo dhaafay noqday kuwa guul-darro u joog ah oo laga saaray gobollo iyo magaalooyin badan.
Bishii Ramadaan ee lasoo dhaafay ayay ahayd markii caasimadda Khartum sida madaxtooyada iyo taliska ciidamada laga saaray maleeshiyadan, gobolkan Khartum ayaa ka kooban saddex magaalo oo wayn sida Khartum oo ah magaalo madaxda iyo Umu-durmaan iyo Khartum Baxri.
About The Author
