Gobolka Rafax ee dhaca koonfurta marinka Gaza waxaa xaalad aad u adag ku wajahaya haweenkii iyo caruurtii ka barakacay waqooyiga Gaza, kuwaas oo xilligan la nool duqaymaha iyo qabowga ka dhashay roobabka ka da’aya gobolkaasi.
Riim Al-Saqqa, oo ah 36 jir ka mid ah haweenka Gaza ee ku barakacay xaaladda ka taagan marinka, ayaa iyadoo ku sugan mid ka mid teendhooyinka ka dhisan Rafax ka warbixisay xaaladda murugada leh ee ka taagan gobolka.
Waxay sheegtay in ay dadku usoo yaaceen bannaanka teendhooyinka, si ay usoo uruursadaan dharkooda, oo ay kasoo laalaadiyeen xargaha dharka lagu wato, si ay u engegaan markii qorraxdu soo baxdo, balse waxay Riima ilmadu cesha waysay markii ay aragtay in dharku ay gebi ahaanba qoyeen biyaha roobka, mana jiro wax badiil ama dhar kale oo ay haystaan maadaama ay kasoo barakaceen wixii adduun ahaa ee ay haysteen.
Xaaladda ka taagan koonfurta Gaza ayaa ah mid murugo badan, mana ahan mid lagu soo koobi karo sheeko iyo qoraal toona, waxaa qabowga halkaas ka dhacaya kasii daran duqaymaha bahalnimo ee ay halkaasi ka gaysanayaan ciidanka gumeystaha Yahuudda.
Hoos Ka Daawo Xaaladda Koonfurta Gaza.
About The Author
