Madal ay ku midaysanyihiin siyaasiyiin iyo masuuliyiin mucaarad ah oo horay xilal kala duwan uga soo qabtay maamul goboleedka ashahaada la dirirka ah ee Jubbaland, ayaa shir ay ku yeesheen magaalada caasimadda ee Muqdisho kaga dhawaaqay go’aan ka dhan ah Axmed Madoobe.
Siyaasiyiintan oo warbaahinta la hadlay waxay kasoo horjeesteen doorashada ay ku tilmaameen halka dhinac ee uu qabsanayo ninka hadda madaxa ka ah maamulka Riddada ee fadhigeesu yahay Kismaayo.
Sidoo kale waxay eedaymo xooggan u jeediyeen Xamze Cabdi Barre, ra’iisul wasaaraha Riddada, kaasi oo ay sheegeen in uu ku guuldarraystay in uu tago Kismaayo, Axmed Madoobena ku qanciyo in uu joojiyo doorashada uu hadda ku dhawaaqay, iyaga oo sheegay in Xamze yahay ninkii soo dhisay Axmed Madoobe doorashadii tan ka horraysay.
Dhanka kale, Axmed Madoobe ayaa xoojiyay baraha Koontrool ee u yaal magaalada Kismaayo, isaga oo magaalada kusoo daadiyay maleeshiyo fara badan, arintaasi ayaa loo sababeeyay cabsi uu ka qabo in kooxda Riddadu abaabul xooggan ka samayso Kismaayo.
Madaxa maamulkaasi Axmed Madoobe ayaa dhagax dhigay garoon macmal ah oo u dhow garoonka magaaladaasi, sababta ka dambeysa dhagax dhiggan ayaa lagu sheegay in uu ka cabsi qabay in ay halkaas fariisimo ka samaystaan maleeshiyada kooxda Riddada, qorsheyaal isaga ka dhan ahna halkaas laga soo abaabulo.
Shalay ayay ahayd markii wafdi ka socday Kenya ay garoonka diyaaradaha ee magaalada Kismaayo kulamo kula qaateen Axmed Madoobe, waxayna usii gudbeen dhanka magaalada Muqdisho iyaga oo la kulmay Xamze Cabdi Barre oo ah ra’iisul wasaaraha murtadiinta, lama sheegin wax natiijo ah oo kasoo baxay kulamadaasi oo ah kuwa ay Kenya xal ugu raadinayso khilaafka ka dhex aloosan Villa Somalia iyo Kismaayo.
About The Author
