Ugu yaraan 26 qof ayaa lagu soo warramayaa inay dhinteen kadib markii labo doonyood ay ku degeen Arbacadii shalay jasiiradda Lampedusa ee koonfurta dalka Talyaaniga.
Wararka ayaa intaas ku daraya in ay jiraan tahriibeyaal kale oo la la’yahay, kuwaas oo ilaa hadda raq iyo ruux toona aan laga hayn sida ay sheegtay hey’ad ka tirsan ururka gaallada ee Qaramada Midoobay.
Doonyahan oo sida la sheegay ay ku safrayeen tahriibeyaal ku dhow 95 qof ayaa waxaa badbaaday 60 qof sida ay xaqiijiyeen mas’uuliyiinta jasiiradda Lampedusa.
Sida ay xogtu tibaaxayso waxaa socda baadi-goobka ku dhawaad toban qof oo weli la la’yahay, iyadoo afhayeen u hadlay hey’ad-gaalleedda IOM uu sheegay in laga cabsi-qabo in dadka dhintay ay tiradoodu gaarayso 35 qof.
Tahriibeyaashan oo sida la sheegay aroornimadii hore ee arbacadii shalay ka ambabaxay caasimadda Daraabulis ee dalka Liibiya, ayaa la sheegay inay kasoo kala jeedeen waddamada Soomaaliya, Sudan iyo Pakistan. Waxaana lasoo werinayaa in dadka dhintay ay ku jirtay ilmo yar oo gabar ah oo da’deeda lagu qiyaasay hal sano jir.
About The Author
