Wararka ka imaanaya galbeedka Itoobiya ayaa sheegaya dhimashada ugu yaraan 50 qof oo shacab ah oo lagu xasuuqay weerar Sabtidi lasoo dhaafay ka dhacay deggaanka Bakuji ee degmada Bulen ee gobolka Metekel oo ka tirsan Ismaamulka Benishangul-Gumuz.
Dadka la laayay ayay xogtu sheegaysaa inay ku jireen caruur yar yar iyo in ka badan 10 ruux oo dumar ah, waxaana ilo-wareedyo aanu helnay ay tibaaxeen in weerarkani uu salka ku hayay isir-sifayn, kaas oo lagu bartilmaameesaday hayb gaar ah.
Gummaadka dadkan rayidka ah ayaa la sheegay in uu dhacay waaberigii hore kadib markii koox hubaysani ay weerar kula jarmaadeen degmadaasi, sida ay warbaahinta u xaqiijiyeen mas’uuliyiin ka tirsan ismaamulka Benishangul Gumuz.
Dadka deggaanka ayaa ku warramay in ay tuhunsan yihiin in xasuuqqan ay ka dambeeyeen fallaagada Oromada ee loo yaqaan OLA, waxaana qof ka mid ah dadka deggaanka oo u warramay Wargeyska Addis Standard uu sheegay in dableydu ay guri-guri u baarayeen aqallada iyagoo mararka qaar hal goob ku wada khaarajinayay ilaa 5 qof oo isku qoys ah.
Xogta ayaa intaas ku daraysa in suuro-gal ay tahay in tirada dhimashadu ay kororto, maadaama ay jiraan ayaa la yiri dhaawacyo garaab ah oo tirakoobkooda aan la sheegin kuwaas oo loo daad-gureeyey cisbitaallo ay ka mid yihiin kuwa magaalada Bahir Dar ee xarunta gobolka Amxaarada.
Ku-xigeenka madaxa maamulka Xabashida ugu magacaaban degmada Bulen, oo la hadlay warbaahinta ayaa xaqiijiyay xasuuqqa ka dhacay degmadaasi, isagoo sheegay in weerarkaasi ay geysteen maleeshiyaad uu ka gaabsaday sheegista magaca ama hayb-soocooda.
Sidoo kale madaxa degmadan oo isna la hadlay mid ka mida warbaahinta Ingiriiska ayaa xaqiijiyey in weerarkani dhacay xilli ciidamada kala duwan ee maamulka gobolku ay wadeen ol’ole amni, maadaama ayuu yiri maleeshiyada OLA ay ku sugan yihiin qaybo ka mida degmada, isla markaana ay maamulaan deggaanno badan oo hoos-taga degmooyin ku teedsan degmada Bulen.
Weerarkan ayaa kusoo aadaya xilli xiisadaha ka aloosan gudaha Itoobiya ay sii laba-jibbaarmeen, gaar ahaanna gobolka Metekel uu ka mid noqday deggaannada qolqolatooyinka ugu darani ay ka dhacaan tan iyo 2019-kii, maadaama weerarradu ay cirka isku shareereen, dhimashada iyo barakaca rayidkuna ay sii kordhayaan.
About The Author
