Koox hubeysan oo aan haybtooda la aqoonsan ayaa meel u dhow magaalada Addis-ababa oo ah caasimadda dalka Itoobiya ka fulisay weerar culus oo lagu beegsaday ciidamo ammaanka ka tirsan iyo shaqaale Itoobiyaan ah, halkaas oo dhegta dhiigga loogu daray ku dhawaad 15 xubnood.
Warbaahinta maxalliga ee Itoobiya waxay sheegtay in weerarka oo si gaar ah uga dhacay degmada Sululta ee gobolka waqooyiga Shewa ee ismaamulka Oromia, qiyaastiina 28 Km u jirta Addis-ababa lagu dilay 14 xubnood oo 11 ka mid ah ay ahaayeen ciidamo ka tirsan kuwa ammaanka ee dowladda xabashida.
Tolera Shula, oo ah madaxa suuqgeynta iyo xiriirka dadweynaha ee Bangiga Iskaashatada Oromia ee magaciisa loo soo kaabiyo (CBO) ayaa sheegay in weerarku dhacay Jimcihii lasoo dhaafay oo ay taariikhdu ku beegnayd 16-ka Agoosto.
Ilo wareedyo maxalli ah ayaa sheegay in xubnaha weerarka ku dhintay ay ka koobnaayeen saddex qof oo shaqaale oo ka tirsanaa bangiga Oromia iyo 11 askari oo ka tirsanaa ciidamada ammaanka, waxaana shaqaalaha bangiga ee la dilay ay kala ahaayeen laba darawal iyo hal qof oo bangigaas u xil saarnaa lacagaha gaadiidka.
War kasoo baxay maamulka Bangiga (CBO) ayaa looga tacsiyeeyay ehellada ay kasoo jeedaan xubnaha bangiga ee la dilay, Tolera, madaxa suuqgeynta iyo xiriirka dadweynaha ee Bangiga Iskaashatada Oromia, ayaa sheegay in meydadka shaqaalaha la dilay loo qaaday cisbitaalka St. Paul ee xaruntiisu tahay magaalada Addis Abeba si baaritaanno loogu sameeyo, ka hor inta aan loo gudbin qoysaskooda oo ku kala nool magaalooyinka Burayu, Sandafa, iyo Gambella, sida uu sheegay.
Kooxda weerarka geysatay ayuu Tolera sheegay inay ahaayeen dabley aan haybtooda si rasmi ah loo aqoonsan, balse ay sugayaan in baaritaannada socda lagu ogaado, bangigiisuna uu si dhow ula socdo dhacdada.
Weerarkan ka dhacay duleedka magaalada Addis-ababa ee caasimadda dalka Itoobiya, ayaa qayb ka ah weerarro isdaba joog ah oo kooxo hubeysan oo ka tirsan mucaaradka xukuumadda Abiy Axmed ku beegsanaayeen saraakiisha, masuuliyiinta, ciidamada ammaanka, iyo gaadiidka dadweynaha iyo kuwa ganacsiga ee isaga goosha deegaanno ka tirsan ismaamulka Oromia.
Bishii Abriil ee sannadkan ayay ahayd markii ugu yaraan 7 qof la dilay kadib kooxo hubeysan weerar ku qaadeen gaari dadweyne oo marayay degmada Abe Dongoro ee gobolka Horo Guduru ee ka tirsan Wollega.
About The Author
