Xoogagga mucaaradka suuriya ayaa weli sii wada horumarrada ballaaran oo ay ka sameynayaan jiidaha hore ee dagaalka waddanka Suuriya.
Waxaa muuqata in kacdoon wadayaashu ay hadda dagaalka uraraan dhanka bartamaha waddanka, kadib markii ay cagta soo mariyeen intabadan magaalooyinka dhaca waqooyiga Suuriya.
Tobannaan degmo iyo tuulooyin ka tirsan gobolka Xammaah ayaa maanta ku dhacay gacmaha xoogaga kacdoonka sunniga, Gaashaanlle Xasan Cabdulqani oo kamid ah saraakiisha hoggaaminaysa howlgalka Radcul Cudwaan ayaa warbaahinta usheegay in ciidamadoodu ay qabsadeen 12 degmo oo katirsan gobolka Xammaah ayna gaareen duleedka magaalada Xammaah ee caasimadda u ah gobolkan.
Degmooyinka ay xoogagu qabsadeen oo gaarayay illaa 15 waxaa kamid ah Xalfaaya,Suuraan,Deybatul Imaam iyo Qalcatul Mudiiq.
Mas’uul u hadlay xoogagga weerarka wada ayaa usheegay warbaahinta in maanta oo kaliya ay dileen 50 askari oo katirsan ciidanka nidaamiga ah ee Bishaar Al-asad madaxda u yahay.
Wararkii ugu dambeeyay ayaa sheegaya in dad ku dhow 2 malyan oo qof ay dib ugu laabteen magaalada Xalab iyo hareeraheeda maalmo kadib markii laga xoreeyay cadowgii deegaannadan haystay shantii sano ee lasoo dhaafay.
About The Author
