Gelinkii hore ee maanta waxa uu dab aad u xooggani ka kacay kaalin shidaal oo weyn oo ku taal bartamaha magaalada Boosaaso ee xarunta gobolka Bari ee dalka Soomaaliya.
Dabkan oo holaciisu cirka isku shareeray ayaa khasaare laxaad leh gaarsiiyey kaalintan oo lagu magacaabo OPEC Boosaaso, kaas oo soo gaaray ilaa gelinkii dambe ee maanta.
Dedaallo xooggan oo dadweynuhu sameeyeen ayaa sababay in dhowr saacadood kabacdi lagu guulaysto in la xakameeyo dabkaasi, iyadoo si weyn looga hor-tagay inuu ku fido meherado ganacsi ee kale.
Ilo-wareedyo ayaa sheegaya in uu jiro khasaare hantiyeed oo aad u ballaaran oo dabkani geystay, iyadoo ay gubteen qaybo ka mid ah kaalinta shidaalka iyo hanti kale oo ku dhoweyd goobtaasi.
Sidoo kale, waxaa lasoo wariyey in dhaawac uu soo gaaray ugu yaraan hal qof oo ka mid ahaa dadkii gurmadka u fidinayey isla markaana daminayay dabkan ka kacay kaalinta shidaalka.
Ilaa iyo hadda si rasmi ah looma shaacin sababta keentay dabkan, iyadoo sidoo kalena weli uusan jirin tirakoob sugan oo muujinaya khasaaraha dhabta ah ee dabkan ka dhashay.
Guud ahaan magaalo-marsada Boosaaso iyo sidaoo kale dekedda laftrkeeda ayaa lasoo wariyey in aysan lahayn dab-damis ku filan, taas oo marar badan lagu dhaliilay maamulka ashahaado-la-dirirka Puntland.
About The Author
