Maamulka ashahaado-la-dirirka Puntland ayaa maanta soo saaray warsaxaafadeed rasmiya oo looga mamnuucayo kooxda Riddada ee uu hoggaamiya Xasan Gurguurte mashruuc ama heshiis kasta oo la xiriira khayraadka badda iyo barriga Puntland.
Warsaxaafadeedka oo ku quran afka qalaad ee Ingiriisiga ayaa lagu sheegay in Puntland ay leedahay awoodda maamulka, ilaalinta, sahaminta iyo ka faa’iidaysiga khayraadka ku jira dhulkeeda iyo biyaha xeebteeda oo dhererkoodu yahay ku dhowaad 1,600 km.
Waxay caddeysay in shirkad kasta oo shisheeye ama dowlad shisheeye, oo ay ku jirto SOMTURK, aysan wax hawl ah ka fulin karin biyaha Puntland, sida kalluumaysiga, maalgashiga ama ilaalada xeebaha, iyadoo aan oggolaanshiyo ka helin maamulka Garoowe.
Maamulka Saciid Cabdullaahi Deni wuxuu ku doodday in hay’adaha kooxda Riddada aysan sharci u lahayn inay bixiyaan heshiisyo ama rukhsado khuseeya dhulka ama badda Puntland, maadaama ayuu yiri, muddo-xileedkoodkoodu uu dhammaaday.
Maamulka Garoowe wuxuu ku saleeyey mowqifkiisa dastuurka kooxda Riddada ee 2012 iyo dastuurka maamulka Riddada Puntland, isagoo sheegay in awoodaha u dhexeeya Villa Soomaaliya iyo maamul-goboleedyada ilaa hadda aan weli si buuxda la iskugu waafaqin loona dhamaystirin.
Bayaanka oo sii socda ayaa sidoo kale lagu xusay, in ilaa inta nidaamka xukuumadda Riddada si buuxda loo dhammaystirayo, uu maamulka Puntland sii wadi doono isticmaalka awoodaha uu siinayo dastuurka gaarka ah ee ay samaysatay.
Maamulkaa Saciid Cabdullaahi Deni waxa uu ka digay in cid kasta oo ka hawlgasha dhulka ama biyaha hoos yimaada Puntland oo aan fasax ka haysan maamulkooda ay la kulmi doonto tallaabooyin baaritaan iyo fulin sharci.
Waxa loogu yeero beesha caalamka ayay Puntland ku war-gelisay, in maamulka Deni uusan ogolaan doonin in Turkiga iyo kooxda Riddada ay cag soo dhigaan xeebaha Gacanka-cadmeed iyo badweynta Hindiya ee Puntland.
Bayaankan ayaa imanaya xilli uu sii laba-laxaadsaday khilaafka xooggan ee ka dhex aloosan Saciid Cabdullaahi Deni iyo Xasan Sheekh Maxamuud, isla markaana gudaha Puntland uu ka socdo abaabul ciidan oo ka dambayso kooxda Villa Soomaaliya.
About The Author
