Ciidanka qalabka sida ee waddanka Suudaan ayaa ku dhawaaqay inay dib ula wareegeen magaalada istaraatiijiga ah ee Kurmuk, ee gobolka Niilka Buluugga ah, kadib dagaallo culus oo ay la galeen isbahaysiga maleeshiyaadka RSF iyo garabka SPLM-N ee uu hoggaamiyo Cabdil-caziiz Al-Hilu.
Sida uu sheegay wargayska Sudan Tribun, taliyaha ciidamada ee hawlgalka Al-Naba’a Al-Yaqiin, ayaa sheegay in ciidamadu gaarsiiyeen maleeshiyada RSF khasaare culus isla markaana ay burburiyeen qalab ciidan, taasoo ku qasabtay maleeshiyaadka inay dib u gurtaan.
Kurmuk oo dhacda xuduud-beenaadka Suudaan la leedahay Itoobiya, ayaa tan iyo bishii Maarso gacanta ugu jirtay isbahaysiga RSF iyo SPLM-N, waxaana toddobaadkii hore ciidanka Suudaan bilaabeen weerar ballaaran oo ay doonayeen inay dib ugu qabsadaan.
Dagaalka Suudaan oo billowday bishii April 2023 ayaa ku fiday gobollo badan, waxaanay dowladda Suudaan horey ugu eedeysay dowladda Xabashida Itoobiya inay taageero dhinaca saadka ah siiso isbahaysiga RSF iyo SPLM-N.
Ilaa hadda, ma jiro xaqiijin madax-bannaan oo caddeyneysa in ciidanka Suudaan ay si buuxda ula wareegeen gacan-ku-heynta magaalada istaraatiijiga ah ee Kurmuk, mana jiraan wax war ah oo ay ka soo saareen RSF ama SPLM-N arrintan.
About The Author
