Inta la xaqijiyay ugu yaraan 6 qof ayaa ku dhimatay silsilado toogashooyin ah oo laga soo calaamadiyay koonfurta waddanka Maraykanka, sida laga soo xigtay saraakiisha ciidamada booliska ee xukuumadda Washington.
Toogashooyinka oo ahaa kuwa is xig-xigay ayaa laga soo tabiyay inay si isku mida uga dhaceen madiqadda Tate ee hoos tagta gobolka Mississippi ee koonfurta waddankaasi Maraykanka.
Ilo wareedyo maxalli ah oo soo xiganaya guddoomiyaha maamulka mandiqadda Tate ninka lagu magacaabo Brad Lance ayaa xaqiijiyay in dhacdadii toogasho ee ugu horraysay ay ka dhacday goob isku imaatin oo lagu magacaabo Arcapotla una dhow xarun ganacsi, taas oo gallaaftay nolasha ugu yaraan 5 qof.
Guddoomiyaha warbaahinta la hadlay ayaa sheegay in 1 qof oo haweenay ah ay weeraryahannadu ku dhex toogteen gudaha guriga isku imaatin, halka 5 kale oo 2 ka mid ahna gudaha gurigaasi lagu dilay ay weerarkaasi ku nafwaayeen halka labada kalena ay ku dhinteen bannaanka goobta isku imaatin.
Saraakiisha ammaanka ee Maraykanka ayaa sheegay inay gacanta ku dhigeen qof looga shakiyay in uu ka dambeeyay weerarka, wallow aysan si rasmi ah u xaqiijin weeraryahanka.
Maraykanka waxaa caadi ka noqday toogashooyinka ay madaxyada isaga gurayaan dadka Ameerikaanka ah, kuwaas oo si maalinle ah looga soo tabiyo gobollada kala duwan ee waddankaas, toogashooyinkaan silsiladaha ah ee laga soo tabiyay gobolka Mississippi ayaana qayb ka ah gummaadka ay isku hayaan dadka kala midibka ah ee ku dhaqan waddankaasi Maraykanka.
About The Author
