Warbaahinta rasmiga ah ee dowladda Ruushka ayaa xaqiijisay in shil diyaaradeed oo saacadihii lasoo dhaafay ka dhacay meel dhanka waqooyi kaga beegan caasimadda waddankaasi ee Moskow ay ku dhinteen 10 xubnood oo Ruushiyaan ah oo uu ku jiray hoggaamiyihii murtazaqada Faagner Prigozhin.
Wakaaladda wararka u faafiso Ruushka ee Tass ayaa sheegtay in Prigozhin iyo 9 xubnood oo la socday oo uu ka mid ahaa ku xigeenkiisa Dmitry Uktin ay ku dhinteen shilkan oo ka dhacay gobolka Tver ee waqooyiga ka xiga Moscow oo ah caasimadda Ruushka.
Inkastoo aan si rasmi ah loo hubin dhimashada hoggaamiyihii Faagner haddana wararka qaar waxay sheegayaan in shilka uu ahaa mid ku talagal ah, oo lagu khaarajiyay Prigozhin, wallow aysan jirin wax war ah oo kasoo baxay Rusia, kaasi oo ku aadan wararka sheegaya geerida hoggaamiyihii murtazaqada Ruushka.
Sawirro laga soo qaaday afaafka hore ee saldhigga murtazaqada Ruushka ayaa lagu arkayay sawirrada hoggaamiyaha Fagner iyo ku xigeenkiisa oo caleemo qoyan la dhinac dhigay, taasi oo ay ku muujinayaan geerida hoggaamiyahooda iyo ku xigeenkiisa.
About The Author
