Khasaare lixaad leh oo isugu jira dhimasho, dhaawac iyo burburka aad u xooggan ayaa ka dhashay weeraro ay qaadeen kooxo hubeysan oo ka dhacay gobolka Plateau ee waqooyiga waddanka Nigeria.
Saraakiil ka tirsan ciidamada dowladda ayaa sheegay in isku dhacdyadaasi oo si wayn u saameeyay gobollo iyo deegaanno badan ay yihiin kuwa salka ku haya, rabshadaha u dhaxeeya xoola dhaqatada iyo beeralayda gobolka.
Guddoomiyaha gobolka Plateau ugu magacaaban dowladda Nayjeeriya ayaa mar uu u waramayay wakaaladda wararka ee Faransiiska yiri “Sida aan kuu sheegaayo Manguu oo kaliya waxaan ku aasnay 15 xubnood, saakana Bokkoos waxa aannu ka tirinay maydad aan ka yarayn 100 qof, walise waxaanan diiwaan gelin oo aan tirakoobin dhimashada dadka Barkin Ladi. ”
Xafiiska hayadda Amnesty International ee Nigeria ayaa dhankiisa wakaaladda wararka ee AP u sheegay in ilaa hadda ay xaqiijiyeen dhimashada 140 xubnood, kuwaas oo lagu dilay weeraro ka dhacay deegaannada Bokkos iyo Barkin-Ladi ee dhaca gobolka Plateau oo ah gobol ay ku badanyihiin dadka Kiristaanka ah.
“Waxaan wacay ciidanka nabad-sugidda, laakiin ma aysan imaan, weerarka ayaa billowday 6-dii fiidnimo, balse ciidamada amaanku waxay soo gaareen goobta 7-dii aroornimo,” waxaa sidaas AP ku yiri Sunday Dawum, oo ah nin Kirishtan ah oo ku sugan Bokkos, isagoo intaas ku daray in ugu yaraan 27 qof lagu dilay tuulada Mbom Mbaru oo ah tuuladiisa, dadka la dilayna uu ku jiro walaalkiisa.
Dadka Kirishtaanka ah ee ku dhaqan deegaannada weerarada lagu hayo ayaa ku eedeeyay weeraradaasi inay ka dambeeyaan kooxo xoolo-dhaqato muslimiin ah oo ka soo jeeda qabiilka Fulani, waxayna sheegeen inay gaysteen weeraro badan oo ka dhacay waqooyi-galbeed iyo gobollada dhexe ee Nayjeeriya, halkaas oo ay in muddo ahba ka taagan tahay xiisada dhul-badeedka iyo biyaha, taasoo ah mid tobannaan sano jirsatay.
About The Author
