Diyaarad nooca kuwa Xamuulka qaada oo laga leeyahay dalka Ruushka nooceedu na uu ahaa Il-76, ayaa la xaqiijiyay inay maanta ku burburtay gobolka Belgorod ee dhaca koonfurta waddankaasi Ruushka.
Diyaaradda ayaa lasoo wariyay inay waday ciidamo maxaabiis ah oo dowladda Ruushka ay ku qabatay dagaallada ay kula jirto ciidamada Ukraine, waxaana wararka qaar ay sheegayaan in dhamaan ciidamadii maxaabiista ahaa ee diyaaradda saarnaa ay shilkaasi ku dhinteen.
Dowladda Ruushka ayaa ka hadashay shilkaan diyaaradeed, warsaxaafadeed kasoo baxay wazaarada difaaca ayaa lagu yiri “24-ka January xilli saacaddu ku beegnayd 11:00 xilliga Moscow, diyaarad nooca Il-76 ayaa ku burburtay gobolka Belgorod xilli ay ku jirtay duulimaad qorsheysan.”
Bayaanka oo sii socda waxaa lagu yiri “Diyaaradda waxaa saarnaa 65 askari oo laga soo qabtay ciidamada Ukraine, waxaana loo sii qaaday gobolka Belgorod, iyadoo ay la socdaan 6 ka mid ah shaqaalihii diyaaradda iyo 3 xubnood oo kale.”
Xukuumadda Moscow waxay sheegtay in goobta uu shilkaas diyaaradeed ka dhacay ay geeyeen koox qaabilsan baaritaannada iyo shaqaale ka tirsan kuwa gurmadka, si ay u baaraan sababaha keenay shilkaasi diyaaradeed.
About The Author
