Inta la xaqiijiyay 400 oo qof ayaa ku dhintay gobollada Tigreega iyo Axmaarada ee dhaca waqooyiga dalka Itoobiya, ka gadaal markii ay dadkaasi soo wajahday xaalad macaluul iyo gaajo ah, sida uu sheegay machad xog uruurinta xaaladaha macluul ay u xil saartay dowladda xabashida.
Machadka soo saaray warbixintan ayaa sheegay in qiimeyn ay sameeyeen khubaro iyo koox ka socotay machadka lagu ogaaday in malaayiin qof oo Itoobiyaan ah ay saameysay macluusha ka jirta labada gobol, taas oo keentay in tobanaan kunna ay xilli horeba ku barakacaan.
Kumanaan caruur ah oo ku kala dhqan goobaha ay xaaladdan ka taagan tahay ayay sheegtay inaysan dhigan iskuul, machadka ayaa sidoo kale intaas ku daray in dadka ugu badan ee macluusha u dhintay ay go’een lixdii bilood ee u dambeeyay.
Bishii Diseembar, ee lasoo dhaafay ayay ahayd markii mas’uuliyiinta sare ee gobolka Tigreega ay ka digeen dhibaato macaluul ah oo la mid ah, tii Itoobiya ay soo martay bartamihii 80-meeyadii, taas oo ay sheegeen inay kusoo fool leedahay waddankaasi haddii aan si degdeg ah wax looga qaban xaaladda hadda taagan.
Xukuumadda Addis ababa ayaa isku dayaysay inay qariso xogta dadka gaajada iyo macluusha ugu le’anaya magaalooyinka waqooyiga Itoobiya, boqollaalkan qof ee dhimashadooda lasoo diiwaan geliyay ayaana ka hor imaanaya hadallo ay horay u jeediyeen masuuliyiin ka tirsan dowladda xabashida, kuwaas oo sheegayay in aan la xaqiijin karin in qof uu gaajo ugu dhintay gobol ka mid ah dalkaasi.
About The Author
