Xildhibaan ka tirsan baarlamaanka dowladda Ingiriiska, ayaa shaaciyay in lagu xiray garoonka caalamiga ah ee magaalada Jabuuti, ka dibna laga masaafuiray guud ahaan dalkaasi, sababo la xiriirta in uu dhaleecayn u jeediyay dowladda Shiinaha.
Tim Loughton, oo soo noqday wasiir hore ayaa ka mid ahaa 7 xubnood oo ay horay cunaqabatayn ugu soo rogtay dowladda Shiinaha, waraysi uu bixiyay ayuu ku sheegay in Jabuuti ay muddo saacado ah u xirtay, sidoo kalena u tarxiishay xiriirka dhow ee kala dhaxeeya Biijiin.
Tim Loughton, oo hadda xubin ka ah Konserfatifka ee haya talada dalka, ayaa sheegay in in ka badan 7 saacadood oo xiriir ah lagu xiray garoonka caalamiga ah ee magaalada Jabuuti billowgii Aprill, lagana mamnuucay in uu gudaha usii galo Jabuuti.
Loughton, ayaa sheegay in Jabuuti ku yimid 8-dii bishan Abriil booqasho uu qorsheeyay inay qaadato muddo 24 saac ah, isagoo ujeedkiisu ahaa in uu la kulmo safiirka Ingiriiska u fadhiya dalka Jabuuti.
Waraysi uu siiyay wargeyska Daily Telegraph, ayuu ku sheegay in uu aaminsan yahay in cabsigelinta, xarigga iyo ceyrinta uu kala kulmay Jabuuti ay tahay mid ulakac ah oo ka dhalatay dhaleeceyntii uu u jeediyay dowladda Shiinaha, waa sida uu hadalka u dhigaye, taasina ay tahay caga-juglayntii ugu dambeysay oo ay muddo saddex sano ah la kulmaan 7-da xildhibaan ee ay cunaqabataynta kusoo rogtay dowladda Shiinaha.
Xildhibaanka la cayriyay ayaa sheegay in uu dhacdadaasi la wadaagay Andrew Mitchell, oo ah ku xigeenka wasiirka arrimaha dibadda ee dowladda Ingiriiska, safiirka u fadhiya dalkaasi ayuu sidoo kale sheegay in la gaarsiiyay warqad uu ku muujinayo hab-dhaqanka foosha xun ee uu kala kulmay Jabuuri.
Afhayeen u hadlay safaaradda Shiinaha ee Jabuuti ayaa dhankiisa sheegay in eedaymahaasi yihiin kuwa aan sal iyo raad toona lahayn isagoo ku tilmaamay eedda xildhibaankaasi Biritish-ka ah hadallo la sameeyay oo aflagaado ah oo la isku dayay in lagu sumcad dilo Shiinaha laguna xumeeyo xiriirka Shiinaha iyo Ingiriiska.
Shiinaha ayaa 2021-kii cunaqabatayn ku soo rogay todobo xildhibaan oo uu ku jiro Tim Loughton, sababo ku aaddan waxa ay ugu yeertay faafinta xogo been ah oo ku saabsan xadgudubyada xuquuqda aadanaha ee Xinjiang.
Dowladda Jabuuti waxay dhiggeeda Shiinaha ka heshay balaayiin doolar oo maalgashi ah, kuwaas oo ay ka mid yihiin in loo dhisay garoon cusub, isbitaal, deked, goob ganacsi oo ku habboon wax soo saarka iyo xarumo bakhaar ah.
About The Author
